Kılaýea — álemdegi eń belsendi janartaýlardyń biri, ol Gavaı arhıpelagynyń Úlken aralynda ornalasqan.
Janartaý 23 jeltoqsan kúni tańerteń atqylaı bastady. Qazirgi ýaqytta lavanyń geızerleri 80 metrden asa bıiktikke jetip, avıasıalyq qaýip deńgeıi qyzyl belgige deıin kóterildi dep habarlaıdy AQSH Geologıalyq qyzmeti
Krater ulttyq parktiń jabyq aımaqtarynda ornalasqandyqtan, lavanyń jergilikti turǵyndarǵa qaýpi joq. Degenmen, sarapshylar výlkandyq tútinniń qaýipi týraly eskertýde. Onyń quramyndaǵy kúkirt dıoksıdi júrek-qan tamyrlary jáne tynys alý aýrýlary bar adamdar úshin zıandy bolýy múmkin.
Janartaýdyń belsendiligin onyń kraterine ornatylǵan beınekameralar arqyly baqylaýǵa bolady.
Kılaýeanyń sońǵy atqylaýy bıylǵy jyldyń qyrkúıek jáne maýsym aılarynda tirkelgen.
Kerek derek
Kılaýea - ot qudaıynyń mekeni
- Ornalasqan jeri: Gavaı araldary, Úlken aral.
- Túri: Qalqandy janartaý.
- Ereksheligi: Álemdegi eń belsendi janartaýlardyń biri.
- Sońǵy atqylaýy: 2024 jyldyń 23 jeltoqsanynda bastaldy. Lavanyń bıiktigi 80 metrge jetti.
- Qaýipter: Kúkirt dıoksıdinen týyndaıtyn výlkandyq tuman (vog) tynys alý jáne júrek-qan tamyrlary aýrýlary bar adamdarǵa zıandy.
- Ǵylymı mańyzy: Janartaýlyq prosesterdi zertteý úshin mańyzdy nysan.
Qyzyqty derek: Kılaýea Gavaı mıfologıasynda ot qudaıy Pele mekeni dep esepteledi.