Qazir 8 memlekettik mekteptiń qurylysy júrgizilýde
Almatyda orta bilim berý salasynda 291 mektep jumys isteıdi. Sonyń 207-si memlekettik mektep. Bul týraly Almaty ákimi Baqytjan Saǵyntaev instagram-daǵy paraqshasyna jazdy.
Barlyǵy 303 110 oqýshy bilim alady. Bul ótken oqý jylymen salystyrǵanda 12 myńnan astam oqýshyǵa artyq. Búginde oqýshy orny tapshylyǵy – 33 812.
«Bul máseleni sheshý úshin «qadamdyq qoljetimdilik» qaǵıdaty aıasynda 12 600 orynǵa arnalǵan 8 memlekettik mekteptiń qurylysy júrgizilýde. Sonyń ishinde 5100 orynǵa arnalǵan 3 mektep bıyl jeltoqsan aıynda paıdalanýǵa beriledi»,-dep jazdy qala ákimi.
8263 orynǵa arnalǵan mektepke japsarlas 17 jańa korpýstyń qurylysy jalǵasýda. Bul rette 4600 oryndy 11 korpýstyń qurylys-montajdaý jumysy bitti. Qalǵan 3663 oryndy 6 ǵımarattyń qurylysy bıyl jyl sońyna deıin aıaqtalady. Jańa oqý jylynyń basynda jeke ınvestısıa esebinen 2656 oryndy 13 jekemenshik mektep ashyldy.