Almaty Pedıatrıa ortalyǵynda súıektiń qaterli isigine shaldyqqan 100-den astam balaǵa kúrdeli ota jasaldy
Elimizde jyl saıyn osteosarkomamen shamamen 20-25 jasóspirim aýyrady. Mamandardyń aıtýlarynsha, barlyq osteosarkomanyń 50%-dan astamy tize býynyna, 30% ıyq-býynyna jaqyn ornalasady.
Sońǵy jyldary súıek isikteri kezinde joǵary mólsherli hımıoterapıany engizý arqasynda basqa organdarǵa metastazdanýdyń tómendeýi jáne ómirsheńdik artty. Bul kóptegen jaǵdaılarda 90%-dan astam zaqymdanǵan aıaqtardy saqtaýǵa múmkindik berdi. Iaǵnı, osy atalǵan patologıasy bar balalarǵa keıbir asqynǵan jaǵdaılardy qospaǵanda, aıaq-qoldardy is júzinde ampýtasıalamaıdy.
Osteosarkomamen emdeýdiń jańa ádisterin engizý tıimdiliktiń álemdik nátıjelerine jaqyndaýǵa múmkindik beredi.
«Pedıatrıa jáne balalar hırýrgıasy ǵylymı ortalyǵynda balalar men jasóspirimderdiń súıek sarkomasy kezinde endoprotezderdi qoldaný arqyly aıaq-qoldardy saqtap qalý boıynsha ota jasaý 2012 jyldan beri júrgiziledi. Ortalyqtyń zamanaýı modýldik endoprotezderdi satyp alý múmkindiginiń jáne qarqyndy joǵary mólsherli hımıoterapıany qoldanýdyń arqasynda múshesaqtaýshy otalardy jasaýdyń múmkindigi artty, sondaı-aq balalardaǵy osteosarkomany biriktirip emdeý nátıjeleri de jaqsardy. Atap aıtatyn jaıt, onkologıalyq endoprotezder ortopedıalyq protezderge uqsas emes, erekshe megaprotezder bolyp tabylady. Qazirgi tańda hırýrgıalyq emdeýdiń osy túri osteosarkomaǵa shaldyqqan balalardyń 90%-dan astamyna jasalynady, ol óz kezeginde balanyń áleýmettik beıimdelýi men onyń ómir súrý sapasynyń jaqsarýyna múmkindik beredi» - deıdi aýyr da, biregeı kúrdeli otany jasaıtyn onkohırýrg, PBHǴO №2 hırýrgıı bóliminiń meńgerýshisi, joǵary sanatty dáriger onkolog, onkoortoped Bahram Jumadýllaev.
Aıaq-qoldy saqtaı otyryp emdeý aıaqtalǵannan keıin jalpy saýyǵyp ketý jaǵdaılary elimizde 71%-dy quraıdy. Bul nátıje osteosarkomany zertteý jónindegi halyqaralyq mýltıortalyqtar nátıjesiniń derekterimen saı keledi.
Sońǵy jyldary boıy qysqa kishkentaı balalarǵa jeke daıyndalǵan az ınvazıvti uzartqysh protezderdi qoldaný arqyly múshelerdi saqtaý operasıalary engizildi.
Onkologıa salasyndaǵy eń kúrdeli operasıa tegin medısınalyq kómektiń kepildendirilgen kólemi negizinde tegin jasalady. Pedıatrıa jáne balalar hırýrgıasy ǵylymı ortalyǵynda aıaqqa ǵana emes, tize, ıyq, jambastyń qaterli isikterine de organ saqtaý operasıalary oryndalady. Biregeı operasıalardyń nátıjesinde balalardyń aıaq-qoldary saqtalyp qana qoımaı, olardyń ómir súrý sapasy da jaqsardy. Búgingi kúni olar ózderiniń qurby-qurdastarymen qatar deńgeıde mektepke baryp, ýnıversıtette oqyp, túrli qyzmette jumys isteıdi. Tipti, sportpen aınalysyp, jattyǵý zaldaryna, baseınderge baryp belsendi ómir súrýde. Tipti turmys quryp 2-3 balanyń anasy jáne ákesi bolyp jatqan «balalarymyz» bar.
«Osy nátıjelerdiń bári bizge, eń mańyzdysy - jańa emdelip jatqan naýqastarǵa ómirge degen úlken qulshynys beredi!», – deıdi ortalyq mamandary.
Aıta keteıik, Respýblıkalyq Pedıatrıa jáne balalar hırýrgıasy ǵylymı ortalyǵynda balalardaǵy osteosarkomalar kezinde iri býyndardy endoprotezdeý boıynsha biregeı kúrdeli operasıalar 2012 jyldan beri jasalady.
Kerek derek
Osteosarkoma – súıektiń sırek kezdesetin qaterli isigi. Qaterli dert kóbine 10 jastan asqan balalarda jıi kezdesedi. Ǵylymı ortalyqta 13 jylda 100-den astam balaǵa mega-endoprotezdeý otalary jasalyndy, bul otalar balalardyń aıaq-qoldaryn saqtaýǵa ǵana múmkindik bermeı, tolyqqandy ómir súrýge yqpal etti.