Almatyda Jastar saıasaty basqarmasy men qala ákimdiginiń jobalyq keńsesiniń qoldaýymen «One day life» qysqametrajdy fılmder serıasynyń premerasy ótti. Joba Jumysshy mamandyqtar jyly aıasynda qolǵa alynǵan, dep habarlaıdy aqshamnews.kz
Qysqametrajdy fılmder eńbegi men tabandylyǵy arqyly ómirdiń qıyndyǵyn jeńip, jetistikke jetken adamdardyń shynaıy oqıǵalaryn baıandaıdy.
«One day life» jobasy jumysshy mamandyqtaryn nasıhattaýǵa jáne túrli saladaǵy eńbektiń mańyzdylyǵyn kórsetýge arnalǵan.
«Bul joba kreatıvti ári maqsatshyl jastar úshin jańa shabyttyń sımvolyna aınalary sózsiz. Osyndaı bastamalar arqyly biz mańyzdy áleýmettik máselelerdi kóterip qana qoımaı, árkim ózin kórsete alatyn shyǵarmashylyq orta qalyptastyramyz», – dedi uıymdastyrýshylar.
Premeraǵa jastar, bilim berý mekemeleriniń ókilderi jáne jastar uıymdary qatysty.
«One day life» jobasynyń árbir qysqametrajdy fılmi qurylysshylar men medbıkelerden bastap, aspazdar men ınjenerlerge deıingi ártúrli jumysshy mamandyq ıeleriniń bir kúndik ómirin kórsetedi. Kórermender keıipkerlerdiń kásibı ómirin ǵana emes, olardyń eńbeginiń qoǵamǵa tıgizetin áserin de kóredi.
Joba avtorlary oqıǵalardy baıandap qana qoımaı, eńbekke degen qurmettiń mańyzdylyǵyn jáne qoǵamnyń damýyndaǵy jumysshy mamandyqtarynyń rólin kórsetýdi maqsat tutqan.