Bul partıa saılaý jarnasynan bosatylady.
Sebebi buǵan deıingi saılaýda 5 paıyzdan artyq daýys jınaǵan, dep habarlaıdy Almaty-akshamy.kz
Ortalyq saılaý komısıasy "Aýyl" halyqtyq-demokratıalyq patrıottyq partıasynyń kandıdattaryn tirkedi.
Komısıa tóraǵasy Nurlan Ábdirovtyń aıtýynsha, partıanyń saılaý jarnasynan bosatylý sebebi buǵan deıingi saılaýda 5 paıyzdan artyq daýys jınaǵan.
"Endi partıanyń saılaý qoryn qalyptastyrýǵa arnaýly ýaqytqa shot ashýǵa bolady. Partıalyq tizimdi tirkeý týraly habar ortalyq saılaý komısıasynyń ınternet resýrsynda jáne buqaralyq aqparat quraldarynda jarıalanady. Sondaı-aq tirkelgen kandıdattarǵa tıisti kýálikterin berýdi tapsyramyn", - dedi Ábdirov.
"Aýyldyń" partıalyq tizimi 25 adamnan turady. Olardyń arasynda prezıdent saılaýyna qatysqan Jıgýlı Daırabaev pen Qaraqat Ábden bar.
Aıta keteri, búginde barlyǵy 29 okrýg boıynsha 609 kandıdat usynylyp otyr. Onyń ishinde 7 saıası partıadan – 79 úmitker, tórt qoǵamdyq birlestikten – 5 kandıdat, qalǵan 525-i – ózin-ózi usynǵandar.
Kandıdattar men saıası partıalardy tirkeý 18 aqpan 18.00-ge deıin jalǵasady. Saılaý aldyndaǵy úgit 18 aqpan 18.01-de bastalyp, 18 naýryz saǵat 00.00-de aıaqtalady.
18 naýryz – tynyshtyq kúni.
Aıta keteri, Parlament Májilisi 98 depýtattan quralady: 69 depýtat partıalyq tizim boıynsha, al 29 depýtat birmandattyq aýmaqtyq okrýgter boıynsha saılanady.
Májilis pen máslıhat depýtattarynyń kezekten tys saılaýy 19 naýryzda ótedi.