Almaty marafony - dástúrge aınalǵan buqaralyq sporttyq shara.
Kópshilik is-shara jyl saıyn 1 qazan kúni ótedi, ıaǵnı búgin ol on ekinshi ret uıymdastyrylyp otyr, dep habarlaıdy Almaty-akshamy.kz Almaty.tv-ǵa silteme jasap.
Almaty marafony AIMS Halyqaralyq jarystar men júgirýler qaýymdastyǵyna kiredi, marafon trassasy World Athletics standartyna sáıkes sertıfıkattalǵan. Bıyl jarysqa álemniń túkpir-túkpirinen kelgen 15 000 sportshy qatysady.
Marafonǵa 15 jastan asqan tilek bildirýshiler 42,2 km, 21,1 km, 10 km, 10 km skandınavıalyq júriske jáne Ekıden komandalyq estafetasyna qatysýǵa bolady. Sóre men máre Respýblıka alańynda josparlanǵan. Márege jetken qatysýshylar máreshiniń estelik medalin alady. Sonymen qatar erler men áıelder arasyndaǵy jas sanattaryndaǵy úzdik úshtik medalmen, gramotamen jáne aqshalaı syılyqpen marapattalady. 21,1 km jáne 42,2 km absolútti jeńimpazdarda aqshalaı syılyq beriledi.
Dástúrli is-shara aıaqtalǵannan keıin jınalǵan qarajattyń bir bóligi qaıyrymdylyq jobalardy qoldaýǵa jiberiledi. 2022 jyly Qaskeleń men Talǵardaǵy múgedektigi bar balalarǵa arnalǵan eki mektep-ınternatqa, «Solnyshko» balalar úıi men «Rehab Team» ońaltý ortalyǵyna sport nysandaryn salyp, qajetti jabdyqtardy satyp alýǵa 45 500 000 teńge bólindi. Buǵan qosa, «Odınnadsat drýzeı Maksıma» komandasyna «Flying Start racing Wheelchair» on jarys arbasy tabystaldy.
Almaty marafonynyń uıymdastyrýshylary: «Birinshi bolý – batyldyq» korporatıvtik qory, «World Class Almaty» fıtnes-klýby, Akademık Sh.Esenov atyndaǵy ǵylymı-bilim berý qory jáne Almaty qalasy ákimdiginiń qoldaýymen #Senińjańaqyryń mýltısporttyq Youtube-arnasy.
Marafondy ótkizýge baılanysty 1 qazanda saǵat 7:00-den 13:30-ǵa deıin jarys ótetin jerlerde joldarda kólik qozǵalysy ishinara jabyq bolady.