Armenıa, Qazaqstan, Qyrǵyzstan, Tájikstan jáne Ózbekstan quramyna kiretin Eýrazıalyq azamattyq avıasıa konferensıasy (EACAC) Almatyda alǵashqy otyrysyn ótkizdi. Bul forýmǵa ár eldiń avıasıa salasynyń ókilderi qatysyp, álemdik avıasıalyq uıymdarmen birlese jumys isteýge baǵyttalǵan qadamdardy qarastyrdy. Otyrysta, sondaı-aq, Mońǵolıanyń avıasıalyq bılik ókilderi baıqaýshy retinde qatysty.
Otyrysty ashqan Qazaqstan Respýblıkasy Kólik vıse-mınıstri Talǵat Lastaev: "Eýrazıa óńirinde alǵash ret azamattyq avıasıa salasynda osyndaı uıym qurylýda. EACAC ushý qaýipsizdigi, avıasıalyq qaýipsizdik, formaldylyqty jeńildetý, ornyqty damý jáne avıasıalyq kadrlardy daıarlaý salasynda tájirıbe almasýǵa múmkindik beredi, bolashaq syn-tegeýrinderge daıyn bolýǵa negiz qalaıdy", – dedi.
EACAC-tyń negizgi maqsaty – Eýrazıa aımaǵyndaǵy múshe elderdiń avıasıalyq bılik organdary arasynda úılestirýdi kúsheıtip, ortaq platformany damytý. Osy maqsatta konferensıaǵa qatysýshylar Azamattyq avıasıanyń Eýrazıalyq konferensıasyn qurý týraly deklarasıaǵa qol qoıdy. Qazaqstan tarapynan bul qujatty QR Kólik mınıstrligi Azamattyq avıasıa komıtetiniń tóraıymy Saltanat Tompıeva bekitti.
Qazaqstannyń avıasıalyq ákimshiliginiń bas dırektory Katalın Radý óz sózinde: "EACAC – halyqaralyq avıasıalyq qoǵamdastyqta pikirlerdi biriktirip, elderimizdiń kúsh-jigerin úılestiretin mańyzdy bastama. Konferensıa salalyq áriptesterden jáne úkimetterden úlken qoldaý aldy", – dep atap ótti.
İs-shara barysynda Qazaqstannyń avıasıalyq ákimshiligi oqytý ortalyǵynyń jobasy men "EASAS ınspektorlar bazasy" biryńǵaı platformasyn qurýǵa arnalǵan tusaýkeserler ótti.
Otyrystyń nátıjesi boıynsha, EACAC bas hatshysy bolyp Qazaqstannyń Kólik vıse-mınıstri Talǵat Lastaev, al prezıdenti retinde Ózbekstan Respýblıkasynyń Azamattyq avıasıa agenttiginiń bas dırektory Tahır Nazarov taǵaıyndaldy.
EACAC mindetteri:
- Aımaqtyq yntymaqtastyqty jáne ózara qoldaýdy nyǵaıtý;
- Ushý qaýipsizdigi men avıasıalyq qaýipsizdikti jaqsartý;
- Ushqyshsyz avıasıany damytýǵa baǵyttalǵan saıasattar men rásimderdi engizý;
- Aımaq elderiniń avıasıalyq múmkindikterin nyǵaıtý, halyqaralyq deńgeıde olardyń ornyn kúsheıtý;
- Tehnıkalyq kómek kórsetý, kadrlardy daıarlaý jáne tehnıkalyq resýrstardyń ortaq "pýlyn" qurý.
Anyqtama: Azamattyq avıasıanyń Eýrazıalyq konferensıasyn qurý ıdeıasy alǵash ret 2023 jyly mamyrda Qazaqstanda ótken "Ortalyq Azıanyń turaqty damýy men tranzıttik áleýetin iske asyrý jolyndaǵy energetıkalyq kóshý" atty avıasıalyq dıalogta kóterilgen bolatyn. 2024 jyldyń sáýir aıynda Týlýzada (Fransıa) ótken IKAO keńesinde EACAC jobasy tanystyryldy.