Bıylǵy Ramazan aıy 23 naýryzda bastalady.
Qasıetti Ramazan aıynda aýyz bekitý adamdy tek rýhanı turǵydan baıytyp qana qoımaı, densaýlyqqa da zor paıda ákeledi. Zamanaýı medısınanyń ózi orazanyń paıdasyn joqqa shyǵarmaıdy. 365 kún boıy tamaq ishetin adam jylyna 30 kún oraza tutqanda, onyń aǵzasy demalady.
Ǵalymdar aýyz bekitken kezde adamnyń ishki múshelerindegi maılar erip, metabolızım jaqsaratynyn aıtyp otyr. Kúnine 14-15 saǵatqa jýyq tamak ishýden tyıylatyndyqtan da, adam aǵzasynda kerek emes jasýshalar joıý prosesi iske qosylady.
Fransýz bıology, Nobel syılyǵynyń laýreaty Aleksıs Karrel óziniń «Belgisiz adam» degen eńbeginde bylaı deıdi: «Adam aýyz bekitkende, eń birinshi ashtyq, odan álsizdik sezinedi. Keıde osynyń áserinen adam qobaljýy da múmkin. Bul syrtqy bolyp jatqan jaǵdaılar, biraq ishki organızmde qubylystar buǵan qaraǵanda mańyzdyraq. Osy sátte búırektegi qant qımyldaıdy, onymen birge teriniń astynda saqtalǵan maılar erıdi. İshki aǵzalar men júrek bir qalypty jumys isteýi úshin organızm ózindegi saqtalǵan qordan qajetti energıa jumsaı bastaıdy. Bul – bolashaqta adam aǵzasynyń jaqsy jumys isteýin qamtamasyz etedi».
Sondaı aq, aýyz bekitken adamnyń este saqtaý qabileti artatyn bolady. Bastapqyda bas aınalý, aýyzdan jaǵymsyz ıis shyǵýy múmkin. Degenmen ýaqyt óte kele, adam aǵzasy ashtyqqa úırenedi.
Aıta ketetin jaıt, aýyz ashqan soń, birden maıly, aýyr taǵamdardy jeýge bolmaıdy. Aǵzany az tamaqtanýǵa jáne qunarly ári jeńil as ishýge daǵdylandyrǵan abzal.
Aýyz bekitý arqyly denedegi maı quramy azaıýmen qatar, holesterın mólsheri de báseńdeı túsedi. Bul qan qoıýlanýynyń aldyn alady.
Eske salaıyq, kúlli musylman qaýymy úshin qasıetti bolyp sanalatyn, erekshe mol saýap pen múmkindikter beretin qasıetti Ramazan aıy 2023 jyldyń 23 naýryzyna túsip tur. Qadir túni 17 sáýirden 18 sáýirge qaraǵan túnge sáıkes keledi. Al Oraza aıt 21 sáýirge belgilendi.