Almaty-akshamy.kz saıtynda búgin jaryq kórgen materıaldarǵa sholý – kún kerýeni
Musylmannyń yntymaǵy artatyn mezgil
Qasym-Jomart Toqaev Qazaqstan halqyn Ramazan aıynyń bastalýymen quttyqtady.
«Qymbatty otandastar!
Sizderdi Ramazan aıynyń bastalýymen quttyqtaımyn! Halqymyz úshin Qasıetti orazanyń mán-mańyzy aıryqsha. Bul – qoǵamda ımandylyq, adaldyq, janashyrlyq, meıirimdilik sıaqty myzǵymas qundylyqtarǵa barynsha mán beriletin kezeń. Búkil musylman qaýymynyń yntymaǵy artyp, bir-birine baýyrmaldyǵy aıqyn kórinetin mezgil. Oraza aıy rýhanı tazarýǵa, muqtaj jandarǵa kómek qolyn sozyp, qaıyrymdylyq jasaýǵa úndeıdi»- dep jazylǵan Prezıdenttiń quttyqtaýynda.
Oraza – rýhtyń azyǵy, tánniń shıpasy
Búgin, 11 naýryzda búkil álem musylmandary úshin eń qaıyrly da qasterli aı — Ramazan bastaldy. Qazaqstan musylmandary dinı basqarmasynyń basshysy, bas múftı Naýryzbaı qajy Taǵanuly elimizdegi búkil musylman qaýymdy quttyqtady.
«Barshamyzdy qasıetti Ramazan aıyna aman-esen jetkizgen Alla Taǵalaǵa sansyz shúkirler bolsyn. Sizderdi berekeli Ramazan aıynyń kelýimen quttyqtaımyn! Ramazannyń qadirin jaqsy túsingen sahabalar orazaǵa alty aı qalǵan sátten bastap: „Rabbymyz, bizdi Ramazan aıyna aman-esen jetkize gór!“ — dep duǵa etken. Saýap eselenip jazylatyn aıda jasalǵan qaıyrly istiń qaıtarymy adam balasy úshin qupıa-syr. Tipti aýyz bekitken adamǵa beriletin syı men saýap, qurmet pen marapat paıǵambarlar men perishtelerge de beımálim. Qudsı hadıste Alla Taǵala „Oraza — tek men úshin. Onyń syıyn (saýabyn) ózim ǵana beremin“ dep orazanyń qadiri men qasıetin, máni men mańyzyn baıandaǵan. Demek sharapaty men shapaǵaty mol aıda saýap jınaýǵa, ishki dúnıemizdi tazartýǵa, Jaratýshynyń razylyǵyn alýǵa asyqqan abzal. Pendeniń osy aıda ustaǵan orazasy, Allaǵa unamdy barlyq qulshylyqtary, ózgelerge jasaǵan qaıyrymdylyǵy, saýapty amaldary eselenip jazylady»,-dedi bas múftı.
Toqaev Ázirbaıjanǵa bardy
Memlekettik saparmen barǵan Qasym-Jomart Toqaevty Geıdar Álıev atyndaǵy halyqaralyq áýejaıda Ázirbaıjan Premer-mınıstriniń birinshi orynbasary Iagýb Eıýbov pen Syrtqy ister mınıstriniń orynbasary Samır Sharıfov qarsy aldy.
Eki eldiń memlekettik ánurany shyrqalǵannan keıin Qasym-Jomart Toqaev pen Ilham Álıev bir-birine resmı delegasıa múshelerin tanystyrdy.
Qursaq jaldaýdyń quny qansha?
Sýrrogat analar óz qyzmetin 2,5 mln-nan 9 mln teńgege deıin baǵalaıdy. Negizgi shyǵyndar paketine áıeldiń aqysynan bólek, ony aı saıyn kútý de kiredi (200 myńnan 250 myń teńgege deıin). Mindetti shyǵyndardyń taǵy biri – genetıkalyq ata-analarǵa arnalǵan EKU baǵdarlamasyn tikeleı júrgizý. Erli-zaıyptylarǵa bul úshin 1,5-2 mıllıon teńge jumsaýǵa týra keledi. Bul soma operatıv jynys jasýshalaryn alý úshin nemese embrıondardy qosymsha genetıkalyq zertteý kezinde jedel medısınalyq prosedýralardy júrgizý qajet bolǵan jaǵdaıda kóbirek bolýy múmkin. Sondaı-aq mindetti shyǵynǵa genetıkalyq ata-analar men sýrrogat ana arasynda shart jasasýdyń notarıattyq qyzmetteri kiredi: shamamen 60 myń teńge. Osylaısha, sýrrogat ana baǵdarlamasynyń mańyzdy kezeńderin ótkizý shyǵyny 6,7 mln-nan 11,3 mln teńgege deıin barady.
26 myń almatylyq kólik salyǵyn tólemegen
Boryshkerlerdiń bereshegi 3,5 mlrd teńgege jetken. 2023 jylǵy kólik salyǵyn tóleý merzimi bıyl 1 sáýirde aıaqtalady. Zańnamaǵa sáıkes, sot oryndaýshylary kólik salyǵyn tólemegen azamattardyń banktegi shottary men múlkin buǵattaýǵa quqyly.
Salyq somasy týraly aqparat kgd.gov.kz portalynda "Jeke tulǵalar úshin aldaǵy tólemder" servısinde, sondaı-aq "e–Salyq Azamat" jáne Kaspı bank pen Halyq banktiń mobıldi qosymshalarynda jarıalanady. Mobıldi qosymshalardyń barlyq paıdalanýshysy kólik salyǵynyń 2023 jylǵa eseptelgen somalaryn kóredi jáne onyń tólemin jasaı alady.
Qazaqstandyq stýdentter koronavırýsqa qarsy dári jasap jatyr
Reseıdiń Ekaterınbýrg qalasynda oqyp jatqan qazaqstandyq stýdentter koronavırýsqa qarsy dári jasaýǵa úles qosyp jatyr. Oral federaldy ýnıversıtetiniń arnaıy ortalyǵynda molekýlalar standarttalyp, keıin dárilik zat shyǵarylady. Vırýsqa qarsy preparattan bólek, dıabetke qarsy tura alatyn dári jasalyp, qazir klınıkalyq zertteýden ótkizilip jatyr.
Jýsan ıisi ańqyǵan
Aqmola oblysy Aqkól aýdanyndaǵy Keńes aýylynyń 5-synyp oqýshysy Albına Aıdarhanova ustazymen birge qazaq dalasynyń hosh ıisi saqtalǵan átir shyǵardy.
Mektep oqýshysynyń aıtýynsha, ony erekshe hosh ıis jasaýǵa Sultan Beıbarys týraly ańyzdaǵy «Jýsanda týǵan jerdiń ıisi bar» degen qanatty sóz shabyttandyrǵan.
Bul hosh ıis «Elim-aı» dep atalady. Jas ónertapqyshtyń aıtýynsha, átirdiń ataýy elimizdiń mádenıetine degen súıispenshilikpen baılanysty.
«Qos mekendiler» kóbeıgen
Qaraǵandy oblysynda jyl basynan beri qos azamattyqqa qatysty 400-den astam derek tirkelgen. Oblystyq polısıa departamentiniń málimetinshe, 15 azamat ákimshilik jaýapkershilikke tartyldy. Qoldanysta bar zańnamaǵa sáıkes, Qazaqstan Respýblıkasynyń azamattyǵy bar adam, ózge eldiń azamattyǵyn qabyldasa, 30 kún ishinde Qazaqstan Respýblıkasynyń ishki ister organdaryna kelip, Qazaqstan Respýblıkasynyń tólqujatyn jáne jeke bas kýáligin tapsyrýy kerek. Tapsyrylmaǵan jaǵdaıda, Ákimshilik quqyqbuzýshylyq týraly kodeksiniń 496-baby 2-tarmaǵyna sáıkes elden shyǵarý jáne Qazaqstan Respýblıkasy aýmaǵyna kirýge 5 jylǵa deıin shekteý qoıý, sonymen qatar 738 myń 400 teńge aıyppul qarastyrylǵan.
Tartyp alýdyń sheberi
Byltyr 8 mamyrda gúl satatyn dúkennen gúl shoǵyn tartyp áketken eks-polıseı taǵy da shý shyǵaryp, dámhanada bir áıeldiń telefonyn tartyp alyp, qaıtarǵysy kelmegen. Telefonyn mas er adamnan ala almaıtynyn túsingen áıel janyndaǵylardan kómek suraǵan. Syra iship otyrǵan er adamnyń byltyr 8 mamyrda florısti ıterip qulatyp, dúkennen gúl shoǵyn alyp ketken otbasylyq sebepterge baılanysty óz ótinishimen ishki ister organdarynan bosatylǵan Qarataý aýdandyq PB-nyń burynǵy qyzmetkeri ekeni anyqtaldy.
Saltanattyń salyǵy da salmaqty
Ulttyq ekonomıka mınıstrliginde Salyq kodeksiniń jobasyna retteýshi saıasattyń konsýltatıvtik qujaty ázirlendi. Onda jeke tulǵanyń barlyq obektileriniń jıyntyq quny 130 myń AEK (2024 jyly 479 960 000 teńge) sheginen asyp ketken jaǵdaıda "sán - saltanat" zattaryna salyq salýdy arttyrý týraly usynys jazylǵan.
Qazalynyń kámpıti Qytaıǵa ketpek
Qazalynyń tanymal kámpıtine Qytaıdan suranys túsken. Tátti shyǵaratyn seh táýligine 400 tonna ónim daıyndaıdy. Qazirgi tańda sehtyń qasynan taǵy bir seh ashyp, jumys kólemin ulǵaıtý josparlanǵan.