Kúlli musylman qaýymy aldaǵy 10 jylda Orazany qysta ustaıdy.
Shamamen tek 20 jyldan keıin ǵana jazda aýyz bekitýge bolady, dep habarlaıdy aqshamnews.kz.
Munyń mánisi nede? Jarty táýlikten asatyn jazdaǵy aýyz bekitý men qystyń qysqa kúnindegi qulshylyqtyń saýaby birdeı me? Ramazan aıy hıjra kúntizbesimen eseptelgendikten, jyl sanap 10-11 kúnge erte keledi. Bıyl qasıetti aı kóktemniń basynda bastalsa, aldaǵy 10 jyl boıy Oraza qys aılaryna túsip tur. Al bul mezgilde kúnniń qysqaryp, túnniń uzaratyny belgili. Sondyqtan aýyz bekitken jamaǵat úshin as-aýqatty ishý arasy uzaqqa sozylmaıdy.
Elde 20 mln-nan asa adam bolsa, sonyń 70%-i ózin musylman sanaıdy. Jaratýshysynan mol saýap kútkender, ramazan aıy kelgende oraza ustaıdy. Jazdygúni 18 saǵatqa deıin aýyz bekitken olar, qazir odan 6-7 saǵat kem qulshylyq qylyp júr. «Munyń ózi edáýir jeńildik», - deıdi turǵyndar. Bıyl álemde eń uzaq Oraza Islandıa, Novegıa, Fınlándıa sıaqty soltústik elderde 20-22 saǵatqa sozylýy múmkin. Al Argentına men Chılı, Aýstralıanyń ońtústik aımaǵynda kerisinshe 11 saǵat qana bolmaq. El arasynda «uzaq ustalǵan Orazanyń saýaby da mol bolady», - degen pikir bar. Muny Qazaqstan musylmandar dinı basqarmasyndaǵylar joqqa shyǵarmaıdy. Dese de «Qaı jer, qaı mezgil bolsyn, durys nıetpen jasalǵan qulshylyqtyń saýyby da az bolmaıdy», - deıdi din ókilderi.
Aǵabek Qonarbaıuly, QMDB baspasóz hatshysy:
- Qysta Oraza ustaısyz ba? Álde shilińgir shildede ustaısyz ba? Ol jerde orazany ıhsan dárejesinde, ıaǵnı kemel túrde ustaýǵa óte mańyz berý kerek. Óıtkeni, bul jerde Alla taǵala bizdiń ózgergenimizdi qalaıdy. Bul jerde Orazanyń eń kemel túri ol júrekpen oraza ustaý. Iaǵnı, búkil bolmysymyzben tula boıymyzdan jamandyqty ketirý. Bul jerde eń basty nárse ózgerý kerek.
«Ramazan bul – jaqsylyq jasap jarysatyn aı. Al Oraza – adamnyń ózin-ózi tárbıelep, sabyr men tózimdilikke úırenip, jaratýshysyna jaqyndatatyn qulshylyq. Jalpy bul aıda musylmandar rýhanı tazarýy tıis. Sondyqtan aldymen orazanyń mánin túsinip baryp qulshylyq qylý abzal», - deıdi din mamandary.