Almatyda jazýshy, dramatýrg Oralhan Bókeıdiń 80 jyldyq mereıtoıyn atap ótý jalǵasyp jatyr. Ál-Farabı atyndaǵy Qazaq Ulttyq ýnıversıtetiniń kitaphanasynda kórnekti tulǵanyń qurmetine «Oralhan Bókeı – kórnekti redaktor, kórkemsóz sheberi» atty halyqaralyq ǵylymı-tájirıbelik konferensıa ótti, dep habarlaıdy almaty-akshamy.kz.
Jıynǵa qara shańyraqtyń ustazdary men aqyndar, qoǵam qaıratkerleri men bilimgerler qatysyp, jas býynǵa jaqyn bolǵan jazýshynyń jarqyn ǵumyryn eske aldy.
– Orekeńniń shyǵarmashylyǵy qaı zamanda da oqyrmanyn da, izdenýshilerdi de ózine qarata bilgen ádebıettegi úlken qubylys boldy. Sol qubylys áli de báseńsigen joq. Oralhannyń ómirden ótkenine mine, bıyl 30 jyldan asyp barady. Biraq, Oralhannyń shyǵarmashylyǵynyń jas ekenin búgingi jastar aıqyndap jatyr, – dedi jazýshy, Qazaqstannyń eńbek sińirgen qaıratkeri Nurdáýlet Aqysh
Aıta keteıik, ulttyq ádebıetti damytýǵa eleýli úles qosqan jazýshynyń esimin dáripteý maqsatynda stýdentter arasynda arnaıy baıqaý jarıalanǵan edi. Baspagerlik-redaktorlyq jáne dızaınerlik óner kafedrasy men demeýshiler uıymdastyrǵan saıystyń qorytyndysy osy jıynda jarıalandy. «Eń úzdik ǵylymı jumys», «Eń úzdik baspasóz materıaly» jáne «Dızaın óneriniń úzdik týyndysy» nomınasıalary boıynsha jeńimpazǵa Oralhan Bókeı atyndaǵy shákirtaqy berildi.
– Pýblısısıkasy, jýrnalısıkasynyń ózi basqalardan erekshelenip turatyn. Sol ádemi jýrnalısıkasyn ádemi jazýshylyqqa aınaldyra bildi. Oralhannyń kez kelgen shyǵarmasy, «Saıtan kópiri», «Ataý keresi», ocherkteri eń aldymen birinshi planǵa adamdy shyǵaryp sóıletetin. Barlyǵynda Oralhan eń aldymen eldiń, halyqtyń jaǵdaıy, bolashaǵy týraly sóz qozǵaıtyn, –dedi jazýshy, Memlekettik syılyqtyń laýreaty Kádirbek Segizbaıuly.