Tegin tamaqpen qamtý proaktıvti qyzmet túrinde bolady.
Elimizde mektep oqýshylaryn tegin ystyq tamaqpen qamtý proaktıv qyzmet túrinde iske qosylady. Bul týraly QR Sıfrlyq damý, ınovasıalar jáne aeroǵarysh ónerkásibi vıse-mınıstri Málik Oljabekov málim etti, dep habarlaıdy Almaty-akshamy.kz QazAqparatqa silteme jasap.
«Turaqty damýdyń 17 maqsaty bar. Sol maqsattarǵa jetý jolynda sıfrlandyrý salasynda iske asyp jatqan keıbir jobaǵa toqtalsam. Aldymen kedeılikpen kúres. Bul oraıda eńbek jáne halyqty áleýmettik qorǵaý mınıstrligi otbasynyń sıfrlyq kartasyn ázirlep jatyr. Sol arqyly ár otbasynyń áleýmettik jaǵdaıy anyqtalady. Sıfrlyq kartada otbasy músheleri týraly málimet bolady. Ekinshi maqsat – ashtyqpen kúres. Ulttyq joba aıasynda agroónerkásip salasynda kórsetiletin qyzmetter men memlekettik qoldaý avtomattandyrylyp jatyr», - dedi Málik Oljabekov Astanada ótip jatqan adam jáne ǵalamsharǵa arnalǵan sıfrlyq sheshimder taqyrybyndaǵy konferensıada.
Onyń aıtýynsha, fermerlerge arnalǵan memlekettik sýbsıdıa berý prosesin sıfrlandyryp, avtomattandyrý prosesi júrip jatyr.
«Sondaı-aq, bıyl qıyn jaǵdaıǵa tap bolǵan otbasylardyń mektep jasyndaǵy balalaryn tegin tamaqpen qamtý proaktıvti qyzmet túrinde iske qosylady», - deıdi ol.
Aıta ketsek, bıyl 1 jeltoqsanǵa deıin elimizde áleýmettik salada 13,1 mln qyzmet kórsetildi. Onyń ishinde 10,6 mln qyzmet elektrondy jáne 1,0 mln qyzmet proaktıvti túrde usynyldy.
Buǵan deıin habarlaǵanymyzdaı, kelesi jyldan bastap elimizde Otbasynyń sıfrlyq kartasy engizilmek.