Mektep jıhazdary oqýshylardyń boıy men jasyna saı kele bermeıdi.
Byltyr jalpy bilim beretin mektepterdiń 2 911 777 oqýshysy tereńdetilgen medısınalyq tekserýden ótti, dep habarlaıdy Almaty-akshamy.kz.
Onyń ishinde 2 480 540 bala (85%) qaraldy. Bul týraly Úkimet basshysynyń orynbasary Eraly Toǵjanov Parlament depýtattarynyń suraǵyna bergen jazbasha jaýabynda kórsetken, dep jazady inbusiness.kz.
Medısınalyq qarap-tekserýlerdiń taldaýy kórsetkendeı, oqýshylar arasynda kórý organdarynyń patologıasy birinshi satyda tur (2021 jyly – 60490 oqýshy).
«Oqýshylardyń kórý qabiletiniń nasharlaýynyń negizgi sebepteri: olardy aqparattyq tehnologıalarmen tanystyrý, oqytýdy kompúterlendirý: gadjetter men uıaly telefondardy belsendi qoldanýmen baılanysty oqý júktemesiniń artýy, mobıldi qurylǵylardyń áleýmettik jelileri arqyly shamadan tys aqparattyq júktemeler, kórý gıgıenasynyń buzylýy, kórý rejıminiń saqtalmaýy», - deıdi Premer-Mınıstrdiń orynbasary.
Ekinshi orynda - 2020 jylmen salystyrǵanda 2,7 ese ósken neıropsıhıatrıalyq aýrýlar (2021 jyly-15946, 2020 jyly - 5872).
«Ósýdiń sebepteri - psıhoemosıonaldy jaǵdaılardyń joǵarylaýy, áleýmettik jeliler arqyly shamadan tys aqparattyq júkteme, telefon men gadjetterge psıhologıalyq táýeldilik, kúndelikti rejımdi saqtamaý jáne basqa sebepter», - degendi aıtady Toǵjanov.
Úshinshi orynda qalyp patologıasy (skolıoz), 2021 jyly 6112 balada skolıoz anyqtaldy (2020 j. - 2517).
«Dene bitiminiń buzylýyna yqpal etetin sebepter - qozǵalys belsendiliginiń jetkiliksizdigi, boı men jasyna saı emes mektep jıhazyna otyrýy, otyrý kezinde deneniń durys ornalaspaýy, ústelge «durys otyrýdy» saqtamaý, arqaǵa asatyn sómkeniń orynyna qoldorba ustaý, aldyn alý jattyǵýlaryn oryndamaý nemese turaqty oryndamaý, t.b.» - delingen jaýapta.
Eraly Toǵjanovtyń jazýyna qaraǵanda, profılaktıkalyq tekserýler, skrınıngtik zertteýler esebinen balalardy der kezinde anyqtaý, dıspanserlik esepke qoıý jáne olardy saýyqtyrý boıynsha jumystar turaqty negizde júrgiziledi.
Oqý-aǵartý mınıstrligi men Densaýlyq saqtaý mınıstrligine kelesi tapsyrmalar berilgen:
– mektepke deıingi jastan bastap bala, ata-ana jáne pedagogtardy gıgıenalyq oqytý men tárbıeleý;
– balalardyń jas erekshelikterin eskere otyryp, mektep jıhazyna qoıylatyn talaptardy kúsheıtý.
Aıta keteıik, atalmysh aqparatqa qaraǵanda, 2021 jyly Aqmola (16%), Mańǵystaý oblystarynda (55,8%) oqýshylardy medısınalyq tekserýmen qamtylǵan úles tómen boldy.