Robottar festıvali ótkizildi
Óskemen qalasynda bıylǵy Balalar jylyna oraı oqýshylar men stýdentter arasynda IT-festıval ótti, dep habarlaıdy Almaty-akshamy.kz Inform.kz-ke silteme jasap.
«New generation» dep atalatyn festıválde oblystyń túkpir-túkpirinen mektep oqýshylary men kolej, ýnıversıtet stýdentteri qatysty. Bilim salasyndaǵy aýqymdy İT-kórmede balalar men jastar óz jobalaryn kórsetip, oı-pikir, tájirıbe almasty.
«Búgin festıválde óz jobamyzdy – antıseptık shashatyn robotty usynyp otyrmyz. Ol dachık arqyly jumys isteıdi, qazaq tilinde erkin sóıleıdi jáne koronavırýs ınfeksıasynyń aldyn alý týraly nusqaýlar beredi. Qazir bul robotty mektebimizge ornatyp qoıdyq», - deıdi O.Bókeı atyndaǵy №44 lıseı-mektebiniń oqýshylary Dilnaz Nábıolda jáne Dıas Ermuhanbetov.
Qatysýshylar 6 baǵyt boıynsha óz jumystaryn usyndy, atap aıtqanda «Kids Skills», «Maker Fest», «Junior Skills», «Startup-jobalar», «Robotime», «ClusterPro». Olardyń ishinde qaýipsizdikti uıymdastyrýǵa, oıyn oınaýǵa, oqytýǵa qatysty joba jasaǵandar boldy. Festıvál barysynda ǵylymı oıyn-saýyq alańy usynyldy. Munda kelýshiler zamanaýı tehnologıalar salasyndaǵy sońǵy jetistiktermen tanysýǵa múmkindik aldy.