Úkimet otyrysynda Oqý-aǵartý mınıstri jaıly mektepter salý tetikteri týraly baıandady. Ǵanı Beısembaevtiń aıtýynsha, joba búginde úsh ádispen júzege asyrylýda.
Birinshisi mektepterdiń qurylysy «Samruk-Kazyna Sonstruction» biryńǵaı operatory arqyly júrgiziledi, dep habarlaıdy almaty-akshamy.kz. Ekinshisi, ákimdikterdiń daıyn ǵımarattardy jeke ınvestorlardan satyp alýy arqyly, úshinshisi memlekettik-jeke menshik seriktestik aıasynda.
Ulttyq jobany iske asyrýǵa jeke ınvestısıalardy tartý maqsatynda Oqý-aǵartý mınıstrligi mektep salýdyń tórtinshi tetigin ázirledi.
«Bul tetik eki taraptan turatyn konsorsıým qurýdy kózdeıdi. Bul jeke ınvestor jáne jetekshi bilim berý uıymy. Ony iske asyrý kezinde obektilerdiń qymbattaý táýekelderi nıvelırlenedi. Iaǵnı, memlekettik bilim berý tapsyrysyn ornalastyrý boıynsha keıinge qaldyrylǵan mindettemeler esebinen búdjetke júktemeler qysqartylady. Investorlardy irikteýdi ákimdikter konkýrstyq negizde júzege asyrady», - dedi Ǵanı Beısembaev.
Aıta keteıik, byltyr 208 jaıly mekteptiń qurylysy bastaldy. Onyń 98-in oqý jyly bastalǵanǵa deıin, qalǵan 110 nysandy 2024 jyldyń sońyna deıin paıdalanýǵa berý kózdelýde. Sonymen qatar, Astana jáne Almaty qalalarynda 9 mektepti jeke qurylys salýshylardan satyp alý josparlanýda. «Jaıly mektep» jobasy boıynsha barlyǵy 740 myń oqýshyǵa arnalǵan 369 mektep ashý josparlanýda.