Búgin QR Mádenıet jáne sport mınıstri Asqat Oralovtyń tóraǵalyǵymen ótken respýblıkalyq onomastıka komısıasynyń otyrysy ótti.
Onda Ońtústik Qazaqstan memlekettik pedagogıkalyq ýnıversıtetine kórnekti memleket jáne qoǵam qaıratkeri, ǵalym-etnograf, tarıhshy, akademık Ózbekáli Jánibekovtiń esimin berý týraly sheshim qabyldandy, dep habarlaıdy Almaty-akshamy.kz.
Ózbekáli Jánibekovtiń qaıratkerlik ónegesi, ulttyq rýhanıatqa qosqan ólsheýsiz úlesi – pedagog mamandardyń baǵdar alar shamshyraǵy ispettes. Dáýir darabozy eldik murat jolynda halyqtyq tanymnyń, ulttyq taǵylymnyń, mádenı muranyń, tarıhı dástúrdiń qaıta túlep jańǵyrýyna aıtýly eńbek sińirdi.
Qaıratkerlik rýhtyń tálim-tárbıege qosar úlesi eskerilip, ýnıversıtette «Ózbekáli Jánibekov ortalyǵy» ashylyp, tarıhymyzdaǵy birtýar tulǵanyń etnografıalyq baı murasyn zertteýge, ulttyq mádenı tanymdy, tárbıe qundylyqtaryn, qazaq mádenıetiniń qalyptasý úrdisin jáne damý belesterin ǵylymı turǵyda dáıekteýge qyzmet etip otyr.