Endi eks-prezıdent bostandyqqa shyǵady
Koreıa Respýblıkasynyń bıligi sybaılas jemqorlyq jáne qyzmettik ókilettigin asyra paıdalandy degen aıyppen 22 jylǵa sottalǵan burynǵy prezıdent Pak Kyn Hege raqymshylyq jasaıdy, dep habarlaıdy Almaty-akshamy.kz
Agenttik málimetinshe, 69 jastaǵy Pak Kyn He jańa jyl qarsańynda raqymshylyqqa ilinetin adamdardyń tizimine engizilgen.
Tıisti sheshim onyń densaýlyq jaǵdaıyn eskere otyryp, gýmanıtarlyq sebeptermen qabyldanǵan. 2019 jyly Pak Kyn He ıyǵyna ota jasatqan, al bıyl eks-prezıdent ıyq pen omyrtqadaǵy sozylmaly aýrýǵa baılanysty úsh ret aýrýhanaǵa túsken. Pak Kyn He tóńiregindegi saıası janjal 2016 jyldyń qazan aıynda onyń qurbysy Chhve Sýn Sıldiń memleket basshysyna áseri týraly aqparat baspasózde paıda bolǵan kezde týdy. Janjalǵa qatysty tergeý onyń birneshe jyl boıy úkimettiń egjeı-tegjeıinen habardar bolyp, saıası sheshimder qabyldaýǵa aralasqanyn kórsetti.
Sonymen qatar, prezıdenttiń qurbysy birqatar kompanıalarǵa qysym kórsetip, onyń qaramaǵyndaǵy qorlarǵa ondaǵan mıllıon dollar aýdarýǵa májbúrlegen.
Sybaılas jemqorlyq faktileri jáne Chhve Sýn Sıldiń memlekettik qyzmetke zańsyz qatysý áreketteri anyqtalǵannan keıin búkil elde iri sherýler tolqyny ótip, oǵan qatysýshylar prezıdenttiń dereý otstavkaǵa ketýin jaqtady.
Parlament sheshimimen Pak Kyn He qyzmetinen bosatylyp, keıin qamaýǵa alyndy. Ońtústik Koreıa sarapshylarynyń pikirinshe, eldiń burynǵy kóshbasshysynyń bosatylýy kelesi jyldyń naýryz aıyndaǵy prezıdenttik saılaýǵa áser etedi.