Óıtkeni Easy Visa kompanıasy ýádesinde turmaǵan.
Koreıa Respýblıkasyna kirýge elektrondy ruqsat alyp beremiz degen kompanıaǵa aqsha ótkizgen 60-tan astam adam san soǵyp qaldy, dep habarlaıdy Almaty-akshamy.kz.
Bul týraly habarlaǵan «Habar 24» arnasynyń málimetinshe, ár adamnan 700 myń teńgeden jınap alǵan fırma jurtty birneshe aıdan beri sandaltyp júr.
Tańǵy shyq elinen kúder úzgender endi kompanıaǵa bergen aqshasyn qaıtara almaı álek. Eki aıdan beri qurǵaq ýádeni qanaǵat tutyp kele jatqan turǵyndar týrısik fırmanyń tabaldyryǵyn tozdyrǵan. Kompanıa mamyr aıynda 60-tan asa adamnyń árqaısysynan 700 myń teńgeden jınap alǵan. Maýsymda daıyn bolady degen qujattan áli habar joq.
«Men ózime, kelinshegime 1 mln 336 myń teńge berdim. Endi bul az aqsha emes, ózim bes tıynsyz 7-8 aı jumyssyz bolǵam. Sol jumys tappaǵandyqtan, Koreıaǵa ketýim kerek bolǵan. Endi sol kredıtke alǵan aqshany salyp, myna jaqtan kredıt qysyp jatyr, al Koreıaǵa attandyrýǵa tıis kisi joq», - deıdi jábirlenýshi Rahat Maılybaev.
Adamdardy aldap soqqan kompanıanyń ǵalamtorda arnaıy paraqshasy bar. Onda shet elge vıza ashý joldary týraly birneshe beınerolık jarıalanǵan. Kóbi osy jarnamaǵa jáne jazbasha kelisimshartqa aldandyq deıdi.
Qomaqty qarajatty jınap alǵan fırma basshylary eki aıdan beri telefonǵa jaýap bermeıdi, keńsege kelse, esik ashpaıdy eken. Shydamy taýsylǵan jábirlenýshiler qalalyq polısıa departamentine aryz jazǵan. Qazir Easy Visa kompanıasyna qatysty is qozǵalǵan.
«Atalmysh azamattardyń aryzy Almaty qalalyq polısıa departamentinde tirkelip, qylmystyq isti júrgizý úshin Almaly aýdandyq polısıa basqarmasyna jóneltildi. Ol jaqta azamattardyń aryzy Qylmystyq kodekstiń 190-baby boıynsha tirkelip, alaıaqtyq deregi boıynsha qazirgi tańda tergeýshiler bul isti óz óndirisine aldy», - deıdi qalalyq polısıa departamentiniń resmı ókili Saltanat Ázirbek.