Olar elshilikten kómek suramaǵan.
Koreıa Respýblıkasynda jalǵan qujat jasady degen kúdikpen Qazaqstannyń 3 azamaty ustaldy. Bul týraly Syrtqy ister mınıstrliginiń resmı ókili Aıbek Smadıarov aıtty, dep habarlady Almaty-akshamy.kz Halyq Uni-ne silteme jasap,
Koreıa Respýblıkasy Kóshi-qon qyzmetiniń málimetinshe, 12 aqpanda Qazaqstannyń 3 azamaty ustalǵan. Ekeýi qamaýǵa alyndy, al úshinshisinen elden ketpeý týraly qolhat alyndy. Qylmystyq is jergilikti prokýratýraǵa jiberildi, - dedi ol SİM-de ótken baspasóz máslıhatynda.
Resmı ókildiń aıtýynsha, ustalǵan úsheý Koreıada jalǵan qujattar jasaýmen aınalysqan.
Kúdiktiler bosqyn mártebesin alý úshin jalǵan málimetter qurastyrdy jáne áleýmettik jeliler arqyly qujattar daıyndady degen kúdikke ilingen. Olar málimetterdi sheteldikter men Qazaqstan azamattary úshin daıyndaǵan. Tergeý barysynda Koreıada turatyn birqatar sheteldiktiń bosqyn mártebesin alý týraly jalǵan ótinish bergeni anyqtaldy, - dedi Aıbek Smadıarov.
Koreı tarapy Qazaqstan elshiligine qylmystyq iske qatysty derekterdi bermegen.
«Derbes derekti qorǵaý týraly" zańyna sáıkes, Ońtústik Koreıanyń quqyq qorǵaý organdary ustalǵandar týraly derbes derek pen ózge de aqparatty Qazaqstan elshiligine berýden bas tartty. Ustalǵan Qazaqstan azamattary Seýldegi elshilikten kómek suramaǵan ári elshilik qyzmetkerlerine aqparat bergen joq», - dedi ol.