QR Strategıalyq josparlaý jáne reformalar jónindegi agenttiktiń ulttyq statısıka búrosynyń basshysy Nurbolat Aıdapkelov Ulttyq halyq sanaǵy dástúrli formatta qalaı júrgiziletinin túsindirdi, dep habarlaıdy almaty-akshamy.kz
«Sanaq suraqtaryna onlaın rejımde jaýap bergender sanaqtan ótkeni týraly habarlamany kórsetedi. Intervúer turǵyn úıdegi barlyq adamdar sanaqtan ótkenine kóz jetkizgennen keıin, óz ýchaskesiniń kelesi mekenjaıyna barady. Bul ýchaskeler halyq sanaǵynyń 1-30 maýsym aralyǵynda ótken birinshi kezeńi barysynda qalyptastyrylǵan bolatyn», - dedi Nurbolat Aıdapkelov Ortalyq komýnıkasıalar qyzmetinde ótken brıfıńte.
Aıta keteıik, 1 qazannan bastap halyqty sanaqpen tolyq qamtý maqsatynda jappaı aralaý kezeńi bastaldy. Ol 30 qazanǵa deıin jalǵasady.
«Qazirgi ýaqytta respýblıka boıynsha sanaq personaly retinde 23 myń adam jumysqa alyndy. Olardyń ishinde 2693 nusqaýshy-baqylaýshy jáne 20 myńnan astam ıntervúer bar. Erekshe atap óterligi, olardyń barlyǵy 18 jastan asqan, COVID-ke qarsy vaksına alǵan, planshet, kompútermen jumys isteı alatyn azamattar. Barlyq ıntervúerlerge planshetpen jumys isteý, saýal salý júrgizý ádisteri boıynsha oqytý uıymdastyryldy. Intervúerde sanaq logotıpi bar kók sharf jáne sómke bolady. Elektrondyq sanaq paraqtary bar planshet, sondaı-aq, beıdj-kýálik beriledi. Bul kýálikte aýmaqtyq statısıka departamenti basshysynyń qolymen jáne mórimen rastalǵan ıntervúerdiń fotosýreti, tolyq aty-jóni bolady. Kýáliktiń joǵarǵy bóliginde tirkeý nómiri kórsetiledi. Bul nómirdi sanaq.gov.kz saıtynda «ıntervúerdi izdeý» jolaǵyna engizýge bolady, sodan keıin saıtta ıntervúerdiń derekteri kórsetiledi. Sondaı-aq, ıntervúerdiń jeke basyn 1446 nómirine qońyraý shalý arqyly da tekserýge bolady», - dep túsindirdi spıker.