Almatyda №16 qalalyq emhananyń bazasynda «Alǵashqy medısınalyq-sanıtarlyq kómek deńgeıinde onkologıalyq saqtyq jáne skrınıngtik baǵdarlamalardy júrgizý máseleleri» taqyrybynda otandyq sheberlik saǵaty ótkizilýde, oǵan jalpy praktıka dárigerleri, ambýlatorıalyq jaǵdaıda medısınalyq kómek kórsetetin densaýlyq saqtaý basqarmasynyń medısınalyq uıymdarynyń dáriger-terapevteri qatysýda, dep habarlaıdy Almaty-akshamy.kz.
Sheberlik saǵatyn S.D. Asfendıarov atyndaǵy Qazaq ulttyq medısına ýnıversıtetiniń onkologıa kafedrasynyń dosenty jáne profesory Arman Hojaev pen Aıjan Djaqypbaeva júrgizedi.
Qazirgi ýaqytta qaterli isikterdi erte dıagnostıkalaý máseleleri jáne onkologıalyq pasıentterdi dıspanserleý aspektileri onkologıalyq tájirıbede basymdyqtardyń biri bolyp tabylady.
Bizdiń elimizde de, shetelde de qaterli isikterdi erte dıagnostıkalaý ádisteriniń jetildirilýine qaramastan, dıagnostıka kezinde pasıentterdiń shamamen 30-40%-ynda aýrýdyń III jáne IV satysy bar. Osyǵan baılanysty qaterli isikterdi erte satysynda anyqtaýdyń negizgi úmiti halyqtyń eń kóp sanyn qamtýǵa jáne popýlásıa deńgeıinde jappaı tekserýdi oryndaýǵa múmkindik beretin skrınıngtik tekserý ádisterine júkteledi.
Onkologıadaǵy Ulttyq skrınıngtik baǵdarlamalary muny tolyq júzege asyrýǵa múmkindik beredi.
«Sheteldik zertteýlerdiń derekterine sáıkes, onkologıalyq skrınıng júrgizý qaterli isikterdi erte kezeńde dıagnostıkalaý jıiligin 10-15%-ǵa arttyrýǵa jáne osy patologıadan bolatyn ólim-jitimdi 5-7%-ǵa tómendetýge múmkindik beredi. Onkologıalyq pasıentterdi dıspanserleý máselelerin bilý búgingi tańda kez kelgen mamandyq boıynsha bilikti dárigerler úshin qajet», - dep atap ótti Oqý-ádistemelik ortalyqtyń basshysy Gúlnara Erdesova.
Sheberlik saǵatyn uıymdastyrýshylar - Almaty qalasy qoǵamdyq densaýlyq saqtaý basqarmasy jáne Joǵary medısınalyq kolejiniń oqý-ádistemelik ortalyǵy. Sheberlik saǵaty jergilikti búdjet esebinen qarjylandyrylady.