1 naýryzda Qazaqstanda Óńirlik kadr rezervterine irikteý bastaldy.
Oǵan joǵary bilimi jáne keminde 3 jyl jumys ótili bar 35 jastan aspaǵan Qazaqstan azamattary qatysa alady, dep habarlaıdy Almaty-akshamy.kz.
Qazaqstan Respýblıkasynyń Prezıdenti taǵaıyndaǵan adamdar, saıası qyzmetshiler, «A» korpýsynyń memlekettik ákimshilik qyzmetshileri, Prezıdenttik jastar kadr rezervine alynǵan adamdar óńirlik rezervke irikteýge qatysa almaıdy.
Óńirlik rezervke alynatyn kandıdattardyń sanyn, salalyq baǵyttardy óńirlik kadr komısıalary óńirdegi áleýmettik-ekonomıkalyq jaǵdaıdy jáne memlekettik basqarý júıesin damytýdyń basymdyqtaryn eskere otyryp, aıqyndaıdy.
İrikteý birneshe kezeńnen turady jáne 2024 jyldyń 1 naýryzynan maýsym aıynyń sońyna deıin jalǵasady.
Rezervte bolý merzimi – 2 jyl. Osy kezeńde rezervshiler saılanatyn laýazymdardy qospaǵanda, jergilikti atqarýshy organdarda «B» korpýsynyń memlekettik ákimshilik laýazymdaryna zańnamada belgilengen tártippen taǵaıyndalýy múmkin.
Saıtta qalaı tirkelýge bolady?
İrikteýge qatysý úshin a.j. 1 naýryzynan 31 naýryzyna deıin onir.pkrezerv.gov.kz onlaın-platformasynda jeke derekterdi kórsetý arqyly tirkelý qajet. Qujattardy qaǵaz jetkizgishte nemese elektrondyq túrde usynǵan kandıdattar da onlaın-platformada tirkelip, qujattardy tapsyrǵannan keıin bir jumys kúni ishinde, biraq habarlandyrýda kórsetilgen qujattardy qabyldaýdyń sońǵy kúninen keshiktirmeı qujattardy júkteıdi.
«Jeke derekter» bóliminde durys baılanys derekterin kórsetýmen qatar, úmitkerler kadr rezerviniń óńirin jáne salalyq baǵytty tańdaýy qajet. Eki jáne odan da kóp óńirlik rezervti nemese salalyq baǵyttardy tańdaýǵa, sondaı-aq óńirlik rezervti nemese salalyq baǵytty qaıta tańdaýǵa jol berilmeıdi.
Sátti tirkelý úshin irikteýge qatysýshylarǵa belgilengen talaptardy saqtaý, usynylǵan málimetter men qujattardyń durystyǵyn qamtamasyz etý boıynsha mindettemeler qabyldaý qajet. Barlyq qajetti faıldar júktelýi kerek.
Jobaǵa qatysý úshin qandaı qujattar qajet?
Óńirlik rezervke irikteýge qatysqysy keletin azamattar kelesi qujattardy qosyp ótinish berý kerek:
- Qazaqstan Respýblıkasy jeke kýáliginiń nemese pasportynyń kóshirmesi;
- bilimi týraly qujattardyń jáne olarǵa qosymshalardyń kóshirmeleri;
- sońǵy jumys orny boıynsha kadr qyzmeti kýálandyrǵan, eńbek qyzmetin rastaıtyn qujattyń kóshirmesi.
Óńirlik rezervke irikteý kelesi kezeńderden turady:
1) kandıdattardyń qujattaryn qabyldaý (1 naýryzdan 31 naýryzǵa deıin);
2) zańnamany bilýge (5 sáýirden 9 sáýirge deıin) testileý jáne jeke qasıetterin baǵalaý (13 sáýirden 14 sáýirge deıin);
3) quzyretterdi baǵalaý (22 sáýirden 7 maýsymǵa deıin);
4) óńirlik komısıadaǵy qurylymdyq suhbat (13 maýsymnan 15 maýsymǵa deıin);
5) óńirlik komısıanyń otyrysynda óńirlik rezervke alýǵa usynylǵan kandıdatýralardy qaraý (15 maýsymnan 17 maýsymǵa deıin).
Birinshi kezeńge qalaı jazylýǵa bolady?
Birinshi kezeń «Zańnamany bilýge testileýge» jazylý tapsyrylǵan ótinimniń qabyldanǵanyn rastaıtyn habarlamany alǵan sátten bastap 2024 jyldyń 31 naýryzy saǵat 23:59-ǵa deıin qoljetimdi bolady.
Keri baılanys
Tirkelý kezinde týyndaǵan suraqtar boıynsha úmitkerler onir.pkrezerv.gov.kz saıtyndaǵy Jivo chaty arqyly táýlik boıy qoldaý qyzmetine, konsýltasıa alý úshin saǵat 9:00-den 18:30-ge deıin 7 7172 96-77-77 telefony (ishki nómir - 3) jáne info@pkrezerv.gov.kz elektrondyq poshtasyna habarlasa alady.
Sondaı-aq onir.pkrezerv.gov.kz platformasynyń «Baılanys» bóliminde Óńirlik kadr rezervi boıynsha óńirlerdegi jaýapty mamandardyń baılanys derekteri kórsetilgen.