Qazaqstandaǵy óńirlik buqaralyq aqparat quraldary birqatar mańyzdy máselelerge tap bolyp otyr. Bul problemalar gazet-jýrnaldardyń taralymyna, jýrnalıserdiń áleýmettik jaǵdaıyna jáne jalpy medıa salasynyń damýyna keri áserin tıgizip jatyr, dep habarlaıdy aqshamnews.kz.
Mádenıet jáne aqparat mınıstrliginiń keńeıtilgen alqa otyrysynda depýtat Bıbigúl Jeksenbaı óńirlik BAQ-tardyń ózekti máseleleri men sheshý joldary týraly sóz qozǵady.
Depýtat qandaı másele kóterdi?
Qaǵaz ben baspa qyzmetiniń qymbattaýy
Sońǵy jyldary qaǵaz baǵasynyń qymbattaýy men baspa shyǵyndarynyń artýy óńirlik gazetterdiń qarjylyq jaǵdaıyn qıyndatty. Bul jaǵdaı merzimdi basylymdardyń ózin-ózi aqtaýyna úlken kedergi keltirip jatyr.
Jýrnalıserdiń baspana máselesi
Burynǵy jyldary jýrnalıserge memleket tarapynan baspana berý dástúri bolǵan. Alaıda, qazirgi tańda óńirlik jýrnalıser bul qoldaýdan tys qalýda. Sońǵy eki jylda Astanada júzden astam jýrnalıs páter aldy. Osy tájirıbe respýblıkalyq deńgeıde keńeıtilip, aımaqtardaǵy BAQ ókilderine de baspana berilse, ádiletti bolar edi.
Jýrnalıserdiń kásibı biliktiligin arttyrý
Mınıstrlik tarapynan jyl saıyn BAQ ókilderine arnalǵan oqytý-jetildirý kýrstaryn uıymdastyrý qajettiligi týyndap otyr. Bul jýrnalıserdiń zamanaýı medıatrendterge ilesip, kásibı daǵdylaryn damytýyna múmkindik beredi.
Poshta qyzmetiniń kemshilikteri
Qazirgi tańda óńirlik gazetter oqyrmandarǵa ýaqtyly jetkizilmeı otyr. Gazetterdi aptasyna bir ret toptap jetkizý úrdisi qalyptasty. Bul oqyrmandardyń merzimdi basylymdarǵa degen qyzyǵýshylyǵyn tómendetti.
Gazet-jýrnal satatyn dúńgirshekterdiń azdyǵy
Burynǵydaı gazet-jýrnal satatyn oryndardyń jetispeýi halyqtyń basylymdarǵa qoljetimdiligin shektep otyr. Dúńgirshekter sanyn arttyrý – aqparat quraldarynyń taralymyn kóbeıtýdiń birden-bir joly.
Taralymnyń azaıýy
Buryn muǵalimder, memlekettik qyzmetkerler merzimdi basylymdarǵa mindetti túrde jazylatyn. Qazir «májbúrleý» joq degen sebeppen bul úrdis toqtatyldy. Osy rette jazylýdyń órkenıetti joldaryn qarastyrý mańyzdy.
Qosymsha qun salyǵy (QQS) máselesi
Qosymsha qun salyǵyn (QQS) merzimdi basylymdardan múldem alyp tastaý nemese olardy kreatıvti ındýstrıaǵa jatqyzyp, salyqtyq jeńildikter qarastyrý qajet. Bul shara óńirlik BAQ-tyń ekonomıkalyq jaǵdaıyn jaqsartýǵa septigin tıgizer edi.
Jýrnalıserdiń blogerlikke ketýi
Salaǵa tıisti nazar aýdarylmaýynyń saldarynan kóptegen kásibı jýrnalıser blogerlikke aýysý beleń alǵan. Sebebi blogıngten túsetin tabys pen erkindik deńgeıi joǵaryraq. Bul úrdis BAQ salasyndaǵy bilikti kadrlardyń azaıýyna yqpal etetini sózsiz.
Máseleniń sheshimi qandaı?
Óńirlik BAQ-tyń damýy – eldegi aqparattyq qaýipsizdiktiń mańyzdy bóligi. Sondyqtan bul máseleler memlekettik deńgeıde qarastyrylyp, naqty sheshimder qabyldanýy qajet. Eń aldymen memlekettik qoldaýdy kúsheıtý kerek. Óńirlik BAQ-qa arnalǵan salyqtyq jeńildikter engizý mańyzdy. Poshta qyzmetin retke keltirip, gazetter oqyrmandarǵa ýaqtyly jetkizilýi tıis. Jýrnalıserdiń áleýmettik máselelerin sheshý, sonyń ishinde aımaqtyq BAQ ókilderine baspana berý máselesin qarastyrý. Dúńgirshekter sanyn kóbeıtý arqyly gazet-jýrnal satatyn oryndardyń sanyn arttyrý arqyly taralymdy ulǵaıtý. BAQ ókilderiniń kásibı deńgeıin arttyrýǵa arnalǵan kýrstardy jyl saıyn ótkizý, - dedi Bıbigúl Jeksenbaı.