Memleket basshysynyń bıylǵy jyldy «Jumysshy mamandyqtary jyly» dep jarıalaýy bul salanyń tamyryna qan júgirte bastady. Qazirgi tańda elimizdiń barlyq óńirinde jumysshy mamandyqtarynyń mańyzdylyǵyn arttyryp, jastardy osy salaǵa tartý úshin túsindirý jumystary júrgizilip jatyr.
Prezıdent tapsyrmasyna saı qolǵa alynǵan baǵdarlar eńbek naryǵynda suranysqa ıe mamandyqtar boıynsha bilikti kadrlardy daıarlaýǵa baǵyttalyp otyr. Jalpy, qoǵamda eńbek naryǵynyń udaıy ózgerip otyratyny belgili. Tipti bir mamandyq joıylyp jatsa, jańadan mamandyq paıda bolyp, suranys pen usynys qatar kelip jatady. Mine, osyndaıda mamandyq tańdaý oqý ordasynyń biliktiligin synǵa salady. Sol úshin eń aldymen oqý ordasy sapaly maman daıarlaý úshin óziniń materıaldyq-tehnıkalyq bazasyn jaqsartýy kerek.
Bul rette Bolatjan Bozymbaev basshylyq etip otyrǵan «Almaty elektromehanıka koleji» naryqtyń talabyna tolyq jaýap bere alatyn mekeme ekenin dáleldep otyr. Jaqynda atalmysh kolej Alataý aýdanyna qarasty Sabıla Myrzashqyzy basshylyq etip otyrǵan №82 jalpy bilim beretin mekteppen ózara Memorandýmǵa qol qoıyp, «Bir mektep – bir daǵdy» («One School – One Skill») jobasyn qolǵa aldy. «Avtoelektrık», «Elektr jabdyqtaryn montajdaýshy» atty negizgi mamandyqtardy tańdaǵan oqýshylar úshin AEMK kolejiniń arnaıy pán oqytýshysy Náljigit Beknur teorıalyq dáristerdi, al AEMK kolejinde oqý óndiristik-isi jónindegi basshynyń orynbasary Asqat Raıhan, pán oqytýshylary Igenbaı Nurbol, Tolybaev Qýanyshbek tájirıbelik sabaqtardy ótkizýdi bastady.
· Taqyrypqa oraı
Orynsha ÁJENOVA, №82-JBB mektebiniń kásiptik baǵdar berý mamany:
Tańdaǵan mamandyqtaryn ıgeretin bolady
Árıne, mundaı jobalar oqýshylardyń qabiletterin shyńdap qana qoımaı, bolashaq kásibinde paıdaly bolýy múmkin. Olar kásibı sheberliktiń bastapqy daǵdylaryn alyp, eńbek naryǵynda básekege qabiletti ári bilim berý uıymdary men jumys berýshiler arasyndaǵy baılanysty nyǵaıtady. Sondaı-aq, jumysshy mamandyqtarynyń bedelin arttyrýǵa kómektesedi. Almaty qalalyq Bilim basqarmasynyń uıymdastyrýymen Naýryzbaı aýdanyndaǵy «Oqýshylardyń ınovasıalyq shyǵarmashylyq ortalyǵynda arnaıy jáne orta bilim beretin kolejderiniń qatysýymen «WordSkills Kazakhstan» standarttary boıynsha «JasSkills Almaty – 2025» qalalyq kásibı sheberlik chempıonaty ótken edi.
Oǵan Almaty elektromehanıka koleji daıyndaǵan «Avtoelektrık» mamandyǵynyń «Shanaq jóndeý» quzyrettiligi boıynsha №82 jalpy bilim berý mektebiniń oqýshylary qatysqan edi. Jarys sharty boıynsha jeńimpaz oqýshylar qalanyń kez kelgen kolejine grant jeńip aldy. Oqý jylynyń sońynda «Avtoelektrık» jáne «Elektr jabdyqtaryn montajdaýshy» atty negizgi mamandyqtaryn tańdap, teorıalyq jáne praktıkalyq bilim alǵan №82 mektep oqýshylary endi AEMK kolejiniń bazasynda tańdaǵan mamandyqtaryn ıgeretin bolady.