Búgin Almaty qalasynda «Almaty – bizdiń ortaq úıimiz» atty úlken qalalyq senbilik ótip jatyr. İs-sharanyń basty maqsaty – qalany taza ustaý, ekologıany jaqsartý jáne eń bastysy, keleshek urpaqqa ónege kórsetý. Qazirgi tańda megapolıste halyq sany 2 mıllıonnan asty. Sondyqtan ár adam qorshaǵan ortanyń tazalyǵyna úles qosýy kerek. Bul «Alataý» dástúrli óner teatrynyń akteri Ońdasyn Besikbasovtyń pikiri.
«Eger turatyn jerimiz taza bolsa, aýamyz da taza bolady. Bul bizdiń nemere-shóberelerimizdiń densaýlyǵy úshin mańyzdy. Sondyqtan mundaı senbilikter aı saıyn uıymdastyrylyp, turaqty túrde ótkizilip turǵany durys dep esepteımin. Tipti, arnaıy is-sharany kútpeı-aq, ár adam kúndelikti júrgen jerin taza ustasa, qalamyz kórkeıe túser edi», - deıdi teatr akteri.