Adamdar jeńil aqshanyń sońyna erip, osyndaı kúmándi jobalarǵa jınaǵan qarajatyn salyp jatyr.
Parlament depýtattary qarjy pıramıdasyn jarnamalaǵandardy qylmystyq jaýapqa tartýdy qarastyratyn zań jobasyna bastamashylyq jasady. Bul týraly Májilistiń jalpy otyrysynda depýtat Iýrıı Lı aıtty, dep habarlaıdy Almaty-akshamy.kz
«Bıyl 11 sáýirde «MUDARABAH CAPITAL» qarjy pıramıdasynan zardap shekkenderdiń biri elordada ózin órtep jiberdi. Bul tragedıaǵa ne sebep boldy? Zań boıynsha qarjy pıramıdasynyń qyzmetine tyıym salynǵan. Alaıda adamdar jeńil aqshanyń sońyna erip, osyndaı kúmándi jobalarǵa jınaǵan qarajatyn salyp jatyr. Alaıaqtar myńdaǵan qazaqstandyqty jınaǵan qarajatynan, kóliginen, páterinen aıyryp, kóbisin nesıe men qaryzǵa batyrdy. Bul óz kezeginde bizdiń azamattardyń qarjylyq saýatylyǵynyń tómendigimen baılanysty», - dedi Iý. Lı quzyrly organdarǵa joldaǵan saýalynda.
Osy oraıda ol buǵan deıin jasalǵan depýtattyq saýaldardyń birinde «MUDARABAH CAPITAL» JSHS qarjy pıramıdasynyń jarnamasyna qatysqandardy jaýapkershilikke tartý týraly aıtylǵanyn eske saldy.
«Sonymen qatar Májilis depýtattary tıisti zań jobasyna bastamashylyq jasady. Onda qarjy pıramıdasynyń jarnamasy úshin qylmystyq jaýapkershilikti engizý eskerilgen. Tıisti rásimderden keıin atalǵan zań jobasyn talqylaýǵa kirisemiz», - dedi depýtat.