Tabıǵattyń bergenin paıdalanyp, oǵan esh zıanyn tıgizbeı ómir súrý.
Bul Jetisý oblysynyń Lepsi aýylynda turatyn Farhat Abýzárovtyń ómirlik ustanymy. Úsh atadan beri omartashylyqpen aınalysatyn ol ózge de ara ósirýshilerge kómektesip keledi. Kánigi maman jer jánnáti Jetisýda óndirilgen baldy Japonıa, Qytaı jáne Arab elderi men Eýropaǵa eksporttaıdy, dep habarlaıdy Almaty-akshamy.kz.
24.kz málimeti boıynsha, Farhat Abýzárovtyń qolyndaǵy tútindetkishti kezinde onyń atasy qoldanǵan. Odan keıin ákesi endi mine ózi paıdalanyp júr. Sondyqtan otbasy úshin ol kóne jádigerdeı qundy. Urpaq sabaqtastyǵyn jalǵaǵan ul ómirdiń mánin omartashylyqtan tapqan.
Farhat Abýzárov, omartashy:
- Aralardan kóp nárse úırený kerek adamdarǵa. Olardyń jumys istegeni bir birimen qarym qatynasy bári óte damyǵan. Adamdar oǵan jete almady dep oılaımyn. Olardyń tamaq ishkeni jumysy bári durys qoıylǵan. Sonyń birazyn jasasa jaqsy bolady.
Farhat bala kúninen úırengen isti jalǵastyryp, bilim alý úshin Rázan qalasyndaǵy omartashylyq akademıasyna túsken. Jary Zarına ekeýi atalǵan joǵarǵy oqý ornyn qyzyl dıplommen bitirdi. Mamandyq alyp elge kelgen soń olar ata kásipti órkendetýge shyndap kirisedi. Erli-zaıyptylar onshaqty jylda omarta sanyn arttyryp, óz salasynyń naǵyz maıtalmanyna aınaldy.
Farhat Abýzárov, omartashy:
- Biz organık bolǵannan keıin hımıalyq preparat paıdalanbaımyz. Aralar birneshe jyl qıyn jaǵdaı boldy. Qazir aralar úırenip ketti. Men omartashy mamany bolǵannan keıin aralar jaqsy bolyp ketti. Ana hımıany bere bergennen olar jaman bolyp ketedi. Imýnıtetteri túsedi. Hımıa bermeseń ózderi kúsh jzınap alady. Tabıǵattyń kúshi beredi.
Lepsi aýylynyń halqy negizinen omartashylyqty kásip etedi. Aýa raıy qolaıly bolǵan jyly olar mol ónim alyp, ony sata almaı qınalatyn. Saladaǵy ózekti máseleni sheshýdi Farhat usyndy. Ol jergilikti atymtaı jomarttardyń birine baldy ydysqa quıatyn kásiporyn ashý kerektigin aıtqan. Bastamasy qoldaý taýyp zamanaýı seh iske qosyldy. Óndiris jolǵa qoıylǵan soń saladaǵylar jańa baǵytty ıgere bastady.
Zarına Abýzárova, tehnolog:
- Bizdiń aımaq ekologıalyq taza bolǵandyqtan osy jerdegi jemis jıdekterge de suranys kóp. Sondyqtan biz sýblımator satyp aldyq. Qurylǵymen taýdaǵy búldirgendi, tańqýraıdy, ózge de ósimdikterdi keptirip shaı jasaımyz. Ázirge shaıdyń tórt túrin daıyndadyq. Olardyń bári paıdaly, emdik shaı bolyp esepteledi.
Omartashylar áýleti bal ónimderimen qatar endi keptirilgen jemis-jıdek satý isin damytýdy josparlap otyr. Osylaısha olar shaǵyn aýylda taǵy bir salanyń negizin qalap, óndiristi órkendetpek.