Attan qulaǵan segiz jasar balany Almaty qalasy jáne oblys dárigerleri aman alyp qaldy, dep habarlaıdy almaty-akshamy.kz
Hamıt ótken jyldyń qarasha aıynda Almaty oblysynda atqa minip qydyrǵanda qulaǵan. Sodan tórt aı boıy qaıta-qaıta ómir men ólim aýzynda bolǵan.
Emdelý barysynda Hamıt jáne onyń ata-anasy birneshe aýrýhanada boldy, onyń jaraqaty eń tájirıbeli degen dárigerlerdiń ózin tań qaldyrdy: aýyr aralas jaraqat, aýyr jabyq bassúıek-mı jaraqaty, mı jáne mı baǵanynyń soǵylýy men zaqymdanýy, bas súıek kúmbeziniń synýy, kóz almasynyń soǵylýy, keýde jáne qursaq músheleriniń soǵylýy.
Alǵan jaraqattan qaýip ótkennen keıin balanyń tynys alýy qıyndaı tústi. Balalar shuǵyl medısınalyq kómek kórsetý ortalyǵynyń dárigerleri balaǵa jaraqat saldarynan paıda bolǵan traheıa stenozy degen dıagnoz qoıdy. Balaǵa traheostomıa, birneshe ret bronhoskopıa jáne traheıany súmbileý jasalǵanyna qaramastan, bala tunshyǵyp qala berdi, joǵaryda atalǵan prosedýralardyń bári esh nátıje bermedi.
Bala birneshe ret reanımasıaǵa tústi, tynys alý jetkiliksizdiginiń saldarynan onyń jaǵdaıy óte aýyr dep baǵalandy. Osylaısha Balalar jedel medısınalyq kómek kórsetý ortalyǵynyń dárigerleri alǵash ret traheıanyń stenozdyq bóligin rezeksıalaý jáne traheıaǵa plasıkalyq ota jasaý sheshimin qabyldady.
«Emdeý nátıje bermedi jáne shuǵyl shara qabyldaý qajet boldy. Kezekti konsılıýmda traheıanyń stenozdyq aımaǵyn rezeksıalaý jáne traheıaǵa plasıkalyq ota jasaýdy sheshtik. Ortalyqta buǵan deıin mundaı ota jasamaǵanbyz, bul Almatyda balaǵa jasalǵan alǵashqy traheıalyq plasıkalyq ota boldy! Balany aldyn-ala profesor K.T. Týrsynov, jaq-bet hırýrgy A.E. Ýrazaeva, keýde jáne irińdi hırýrgıa bóliminiń meńgerýshisi S.A. Myrzahmet qarap tekserdi. Otany aýrýhananyń jetekshi mamandary júrgizdi, ota eki saǵatqa sozyldy. Hırýrgtar traheıany qalpyna keltirdi, bala ózi dem alatyn boldy», - deıdi Almaty Balalar jedel medısınalyq kómek kórsetý ortalyǵy dırektorynyń orynbasary Dımash Rýzýddınov.
2024 jyldyń 14 aqpany segiz jasar Hamıt úshin aıtýly kún - ol tolyǵymen qalpyna keldi.
Otany hırýrg SAMATBEK MYRZAHMET, anestezıolog AIGERIM KÝLIMBETOVA, asıstentter jaq-bet hırýrgy AIDA ÝRAZAEVA, balalar hırýrgy JALGAS KÝNIAZOV jasady.
«Men osy aýrýhananyń hırýrgtary men ákimshiligine ota jasaý týraly sheshim qabyldaǵany úshin sheksiz alǵysymdy bildiremin. Bizdiń balamyz Hamıt aýyr jaǵdaıda, óz betimen dem ala almaǵan kúıde tústi. Ulym osynda, Almatyda traheoplastıkadan ótti, shetelden aýrýhana izdeýdiń qajeti bolǵan joq. Mundaı ota buryn-sońdy bul jerde jasalmaǵan eken. Degenmen, dárigerlerdiń kásibı sheberliginiń arqasynda bári oıdaǵydaı ótti. Tórt aı uzaq emdelgennen keıin Hamıt qazir úıde, mektepke baryp júr jáne jaqsy baǵa alyp jatyr. Bizdi tastamaı, qoldan kelgenniń bárin istegen dárigerlerimizge rahmet», - dep qosty balanyń ákesi Muhan.