Avstralıalyq Nık Výıchıch sırek kezdesetin sındrommen – eki qoly, eki aıaǵy joq kúıinde týǵan. Biraq aqyl- esi saý. Sondyqtan da ata-anasynyń ótinishimen múgedekterge arnalǵan emes, kádimgi mektepte bilim alýǵa múmkindik alǵan.
Ol týǵan kezde dárigerler ata-anasyna «Óte ókinishti, sábılerińiz eshqashan júre almaıdy» degen eken. Ómirge qushtar Nık bul úkimdi joqqa shyǵardy, tipti aıaq tusyndaǵy kishkene eki saýsaǵynyń kómegimen tisin ysýdy da ózi úırene bastaǵan.
Árıne, oǵan qol-aıaǵy bútin synyptastarymen birge oqý asa ońaı bola qoımaǵan. 10 jasynda synyptastarynyń mazaǵyna, kemsitýine shydamaı, sýǵa batyp ólgisi kelgen kórinedi. Biraq ony bul raıynan ata-anasy qaıtarǵan. Ol qol- aıaqsyz-aq serfıngpen aınalysty, skeıtbord tebe bastady. Bos ýaqytynda gólf oınaǵandy unatatyn. 19 jasynan bastap jasóspirimder, stýdentter aldynda ózi týraly áńgimelep, olardy ómirdi súıýge úndeı bastaǵan. Onyń oratorlyq qabileti dál osy kezde ashylǵan sekildi.
Aıaq jaǵyndaǵy kishkene saýsaqtarynyń kómegimen kompúterde mınýtyna 45 sóz terý arqyly kitap jaza bastaǵan. Bertin kele óziniń ómir joly, kezdesken qıyndyqtary men qyzyq-qýanyshtary jáne qandaı qıyndyq bolsa da moıymaǵan múgedek jandar týraly baıandaıtyn «Jızn bez granıs», «Neýderjımyı», «Lúbov bez granıs», «Býd sılnym» syndy kitaptaryn jazyp shyǵarǵan. Ol eki joǵary oqý ornyn bitirgen, býhgalter jáne qarjyger degen eki mamandyǵy bar. Qazirgi tańda – mıllıondaǵan adamǵa shabyt syılaýshy motıvator, orator jáne mesenat. Álemniń 60-qa jýyq elin aralap, mektepter men ýnıversıtetterde sheberlik sabaqtaryn júrgizip, ómirden baz keship júrgen kóptegen jannyń júregine úmit otyn jaǵa bilgen meıirimdi adam.
Nıktiń búginde súıikti áıeli, tórt balasy bar. «Men de, meniń áıelim de kedeı otbasynan shyqqanbyz. Meniń aınamnyń aldynda ash, biraq jymıyp turǵan afrıkalyq jetim balanyń sýreti ilinip tur. Men sol sýretke qaraǵan saıyn ómirde qandaı qıyndyq bolsa da shúkir ete bilý kerektigi, eseıgen kezde jetimderge qolushyn sozǵym keletini týraly oılaıtynmyn. 19 jasqa tolǵanda Afrıkadaǵy jetim balalarǵa 30 myń dollar aýdardym. Men bul maqsatqa birden jetpesem de, birtindep jettim. Búginde zaıybym ekeýmiz 15 jetim balaǵa turaqty túrde demeýshilik jasaımyz. Meniń balalarym ol balalarǵa hat jazady. Óz balalarymdy qaıyrymdy, meıirimdi bolýǵa úıretemin. Ár adam ózinen bastaýy kerek!», – deıdi ol.