Qazaqstan Respýblıkasynyń Premer-mınıstri Oljas Bektenov Ázerbaıjannyń Astanadaǵy elshiligine baryp, Aqtaý qalasynyń áýejaıy mańynda oryn alǵan Az Airlines áýe kompanıasyna tıesili Embraer 190 ushaǵynyń apatyna baılanysty kóńil aıtý kitabyna jazba qaldyrdy.
26 jeltoqsan kúni Ázerbaıjanda qaraly kún jarıalanyp, qaza tapqandar bir mınýt únsizdikpen eske alyndy.
«Bul qıyn sátte Qazaqstan Úkimetiniń jáne óz atymnan qaza tapqandardyń otbasylaryna, týystary men jaqyndaryna qaıǵyryp kóńil aıtamyn. Orny tolmas aýyr qaıǵyǵa ortaqtasyp, apat saldarynan zardap shekkenderdiń tezirek saýyǵyp ketýin, ázerbaıjan halqyna sabyr men tózimdilik tileımin. Biz baýyrlas Ázerbaıjanǵa tıisti kómek qolyn sozyp, jan-jaqty qoldaý kórsetemiz», — dep jazdy Oljas Bektenov.
Buǵan deıin Premer-mınıstr qaza tapqan qazaqstandyqtardyń týǵan-týystaryna kóńil aıtyp, zardap shekken Ázerbaıjan, Reseı jáne Qyrǵyzstan azamattaryna jan-jaqty qoldaý kórsetýdi tapsyrdy. Aqtaýda qaza tapqandardyń otbasy múshelerine qajetti kómek kórsetilýde.