Qostanaı oblysyna jumys sapary barysynda Premer-mınıstr Oljas Bektenov óńirdiń áleýmettik-ekonomıkalyq damý perspektıvalary, óndiristik kásiporyndar jáne kadrlyq áleýetti arttyrý máselelerin talqylady. Sonymen qatar, biryńǵaı ýaqyt beldeýine kóshý máselesi erekshe nazarǵa alyndy, dep habarlaıdy aqshamnews.kz
Kezdesýde turǵyndar biryńǵaı ýaqyt beldeýine kóshý tabıǵı ýaqytqa sáıkes kelip, kúndelikti turmysty jeńildetkenin aıtyp, bul sheshimdi qoldady.
Premer-mınıstr bul sheshimniń tereń ǵylymı zertteýler negizinde qabyldanǵanyn atap ótti. Ol 2017 jyly amerıkalyq ǵalymdardyń adamnyń sırkadtyq yrǵaǵyn zerttegeni úshin Nobel syılyǵymen marapattalǵanyn eske saldy. Ǵylymı dálelder tabıǵı ýaqyt beldeýine sáıkestiktiń adam densaýlyǵy men ál-aýqatyna oń áser etetinin kórsetedi. Bul negizde 2022 jyly Barselona deklarasıasy qabyldanyp, 80-nen astam eldiń ǵalymdary men saıasatkerleri tabıǵı ýaqyt beldeýine kóshýdi qoldady.
«Qazaqstan úshin tabıǵı ýaqyt beldeýi – biz qazir ómir súrip jatqan UTC+5. Buryn biz dırektıvalyq tártippen tabıǵı emes UTC+6 beldeýinde ómir súrdik. Bul sheshim keıbir adamdar úshin bastapqyda qolaısyzdyq týdyrýy múmkin, biraq ýaqyt óte aǵza beıimdeledi. Biz azamattardyń ómirin barynsha jeńildetý úshin jaryqtandyrý, keste uıymdastyrý jáne basqa da ınfraqurylymdyq sharalardy júzege asyramyz», – dedi Premer-mınıstr.
Kezdesýde zaýyt ujymdary eńbek jaǵdaılary men qoldaý sharalaryn talqylady. Oljas Bektenov Memleket basshysy jarıalaǵan «Jumysshy mamandyqtary jyly» qarsańynda eńbekkerlerdiń quqyǵy men ál-aýqatyn qamtamasyz etýge basa nazar aýdarylatynyn aıtty.