Oıyndardyń bastalýyna 158 kún qaldy
Memleket basshysynyń tapsyrmasy boıynsha qurylǵan Olımpıalyq oıyndarǵa daıyndyq shtaby óz jumysyn jalǵastyryp jatyr.
Búgin jedel shtabta Týrızm jáne sport mınıstrligi Sportty damytý dıreksıasy Ulttyq Olımpıada komıteti ókilderimen kezdesti.
Jıynda birqatar másele talqylandy. Búginde Qazaqstan quramasynyń qorjynynda sporttyń 8 túri boıynsha 19 joldama bar (sadaq atý - 4, tas joldaǵy velosport - 3, nysana kózdeý - 5, qazirgi bessaıys - 2, boks – 2, grek-rım kúresi - 1, erkin kúres - 1, sporttyq gımnastıka - 1). Jospar boıynsha 25 sport túri boıynsha lısenzıalardyń sanyn 90-ǵa deıin jetkizý mindeti tur. Sondaı-aq, júldege úmitker 54 sportshydan turatyn tizim jasaqtaldy.
Qurama kóshbasshylary ár sport túriniń ereksheligin eskere otyryp, jeke jospar boıynsha daıyndalady. Bir sózben aıtqanda olar eshteńege muqtaj bolmaıdy. Olımpıada aldyndaǵy testilik jarystarǵa qatysý da mańyzdy ekeni tilge tıek etildi. Ár sport túriniń jarys kestesine sáıkes, komandalardyń Parıjge ushyp barý ýaqyty bekitiletin boldy.
Sonymen qatar, ulttyq qurama sport kıimi úlgisiniń dızaınyn bekitip, ony daıyndaý erekshe nazarda bolatyny eskerildi.
2024 jylǵy 17 sáýirde búkil el boıynsha «Olımpıadaǵa 100 kún» is-sharasy ótedi. Aıtýly kúnge oraı flesh-mobtar men sporttyq jarystar uıymdastyrylady.
Tórtjyldyqtyń basty dodasy 26 shilde men 11 tamyz aralyǵynda Fransıa astanasy Parıjde ótedi. Oǵan álemniń 205 elinen 10 myńnan astam sportshy qatysyp, 32 sport túrinen 329 medal jıyntyǵy sarapqa salynady.