Almaty áýejaıynda ony jankúıerleri qarsy aldy.
Almaty áýejaıynan Tokıo-2021 Olımpıadasynyń qola júldegeri Eldos Smetovti týǵan-týystary, bapkerleri, dostary men sporttaǵy áriptesteri saltanatpen qarsy aldy, dep habarlaıdy Almaty-akshamy Exk.kz cilteme jasap.
Tańǵy reısti kútip alýǵa Eldostyń jaqyndarynan bólek, óz betinshe qulaǵdar bop kútip alýǵa kelgen jankúıerleri de kóp jınaldy. Sport mektepteriniń jas túlekteri «Eldos — chempıon! Alǵa, Qazaqstan!», «Jaraısyń, Eldos! Sen chempıonsyń!» degen sekildi plakattar ustap, gúl shoqtarymen kútip aldy. Ulttyq kıim kıgen qyzdar alqalap, jas aqyn dombyramen arnaýyn tolǵady. Ájeler qazaqtyń salt-dástúrimen shashý shashyp, dostary Eldosty tóbesine kóterdi.
«Áýeli elime, jerime, otandastaryma, ata-anama alǵys aıtqym keledi. Shet elde dodada júrip, sizderdiń qoldaýlaryńyzdy sezindim. Bul bizdiń 5 jyl kútken dúbirli dodamyz, úlken bir synymyz boldy. Ózderińizge belgili, pandemıa bar álemge qıynshylyqtar, aýyrtpalyqtar alyp keldi. Onyń keri áseri sportqa da tımeı qoımady. Biraq men ózimdi 100 paıyz daıyn sezindim, kúsh-jigerimdi tolyqtaı qoldanyp, ózimdi kórsete bildim dep aıta alamyn. Amal ne, altyn medal buıyrmady. Biraq, halqym meniń qola júldemdi altyn medaldaı qabyldap jatyr. Maǵan eń bastysy — elimniń, jerimniń rızashylyǵy. Halqymnyń qýanyshyna ózim de rıza bolyp turmyn», –dedi Eldos jýrnalıserge bergen shaǵyn suhbatynda.