Qazaq ádebıetiniń klassıgi Berdibek Soqpaqbaevtyń «Ólgender qaıtyp kelmeıdi» romany túrik tiline aýdaryldy.
Balalar ádebıeti aqsaqalynyń qalamynan shyqqan romannyń túrikshe nusqasy 2000 danamen basylypty. Tusaýkeseri Almatydaǵy ulttyq kitaphanada ótti, dep habarlaıdy Almaty-akshamy.kz 24.kz-ke silteme jasap.
Romandy túrik jazýshysy Hýseın Varol aýdarǵan. «Ólgender qaıtyp kelmeıdi» – jastyq shaǵy soǵystyń aýyrtpalyǵymen qatar kelgen adamdardyń ómiri týraly shyǵarma. Jıynǵa TÚRKSOI uıymynyń bas hatshysy, qazaq ádebıetiniń ókilderi qatysty. Bıyl Berdibek Soqpaqbaevtyń týǵanyna 100 jyl tolady. Qalamgerdiń «Meniń atym Qoja», «Balalyq shaqqa saıahat», «16 jasar chempıon» syndy shyǵarmalary da oqyrmanǵa etene tanys. Jazýshynyń eńbekteri búginge deıin álemniń 68 tiline aýdarylǵan. Al túrik jazýshysy aýdarmaǵa 2 jyl ýaqytyn jumsapty.
Hýseın Varol, jazýshy:
«Alystan alty jasar bala kelse, alpystaǵy qart sálem beredi». Bul – qazaqta sálemniń mańyzdylyǵyn, dástúrin kórsetetin sóz. Túrikterde de sálemdesýdiń maǵynasy tereń. Osy syndy maqal-mátelderdi, aýyldyń turmys-tirshiligine baılanysty sózderdi aýdarý qıyn boldy.
Ulyqbek Esdáýlet, TÚRKSOI jazýshylar odaǵynyń tóraǵasy:
24 qazanda bıyl týǵan jeri Almaty oblysynyń mynaý Raıymbek aýdanynda, Narynqolda kádimgi halyqaralyq deńgeıdegi IýNESKO-nyń, TÚRKSOI-dyń deńgeıindegi mereıtoı sharalary ótkiziledi. Jalpy Berdibek Soqpaqbaevtyń 100 jyldyq mereıtoıy Túrkıada bastalǵan.