«Aq sáýlem» ánimen tyńdarmannyń júregin jaýlaǵan tanymal ánshi Óktem Altaev Almatydaǵy jalpyqalalyq senbilikke úles qosty. Jeltoqsan saıabaǵynda qolyna kúrek ustap, tal ekti. Tazalyq aksıasyn merekege balaǵan ánshi kóńil-kúıiniń joǵary ekenin aıtady.
«Qolǵa kúrek ustaǵan kezde, boıda qan tarap, atqa mingen qazaq qusap delebeń qozady. Qalanyń tazalyǵyna, jasyl jelektiń kóbeıýine, aǵashtardyń japyraq jaıýyna úles qosyp, tal egip jatqan jaıymyz bar. Qazaq «Bir tal kesseń, on tal ek» dep aıtady ǵoı, búgin halyqpen birge tal egip jatqanyma qýanyshtymyn», - dedi Ó.Altaev.
Aıta keteıik, bıylǵy aksıany qala ákimdiginiń qoldaýymen «Posadiderevo.kz» RQB, ECONETWORK, Qazaqstannyń kógaldandyrýshylar qaýymdastyǵy, «Sporttyq týrıser dostastyǵy» QU, «Greenup.kz» QQ qoǵamdyq uıymdary uıymdastyrǵan. Aksıa barysynda 5 myńǵa jýyq aǵash otyrǵyzylady.