Oıyn balalary áreketin kameradan tys jerde jasaǵan
«Oıynnan ot shyqty». Qonaev qalasyndaǵy №5 orta mekteptiń oqýshylary synyptastaryn taldyryp kórip, ajalmen oınaǵan. Jurttyń záresin alǵan qorqynyshty oıynnan segizinshi synyptyń oqýshysy zardap shegip, tisteri synǵan, dep habarlaıdy Almaty-akshamy.kz Almaty.tv-ge silteme jasap.
Aýzy-murny qanjosa bolǵan jasóspirim qazir em alyp jatqan kórinedi.
Bul qorqynyshty kadrlerde oıyn balasy oıynnan ot shyǵaryn bilmesten, synyptasyn qabyrǵaǵa qysyp alyp taldyryp jatyr. Jıyrma ret otyryp turǵyzyp, demi tarylǵanda keýdesin qysyp qalady. Mıǵa ottegi jetpegen oqýshy on sekýndqa o dúnıege attana jazdap, esinen tanady.
«Oqýshylar emes qazir úlkenderdiń ózi kirip ketetin boldyq qoı. Zaman sondaı bolyp ketti me?! Tárbıeniń bári otbasynan bastalady ǵoı. Olardy basqa baǵytqa sportqa, úıirmelerge tárbıeleý kerek. Bos ýaqyty kóp», – dedi ata-ana Erden Ádilbekov.
Oqýshynyń oıyn oırandaıtyn oıyndarǵa qazir jeli de jurt qarsy bolyp jatyr. Eń soraqysy olar túzden kórgenin mektepte jasap kóredi.
Synyptastary tynysyn taryltyp, demin tejep, qas-qaǵym sátte taldyryp oınaǵan jaǵdaı dál osy jerde bolǵan. Oıyn balalary bul áreketin ádeıi kameradan tys jerde jasaǵan. Tipti esikti jaýyp qalqalap qoıǵan. Al mektep basshylyǵy barlyq ata-anamen túsindirme jumysyn júrgizgen. Endi bilim ordasyndaǵy baqylaýdy kúsheıtpek.
«Únemi jumys jasap otyramyz. Semınarlar ótkizedi. Ata-analarmen de jumys jasaımyz. Vebınarlar da ótedi, biz qatysamyz. Bul jerde menińshe eki jaqtyń da kinási bolyp tur. Bizdiń de kánimizdi joq dep aıta almaımyn. Óıtkeni baqylaý bolmaǵan bolmaǵan», – dedi №5 orta mektep dırektorynyń mindetin atqarýshy Maqpal Tóleýhanqyzy.
«Bul iske qatysty qazir oqý bólimshesiniń jaýapty ókilderimen qatań tártiptik eskertý júrgizildi. Sonymen qatar basqa da mektepter arasynda aldyn-alý sharalary júrgizildi. Zardap shegýshi men onyń densaýlyǵyn nuqsan keltirgen oqýshylar arnaıy esepke alyndy», – dedi Qonaev QPB aǵa ınspektory, polısıa maıory Gúlmıra Týrına.
Densaýlyǵyna ortasha jaǵdaıda nuqsan kelgen oqýshy qazir Almatyda em alyp jatyr deıdi synyp jetekshisi. Balanyń ata-anasy ázirge tolyq aqpar bere qoımapty.