Qazaqstan Respýblıkasy Parlamenti Májilisiniń Zańnama jáne sot-quqyqtyq reforma komıtetiniń múshesi Únzıla Shapaq áleýmettik jelide oıyn bıznesi máseleleri týraly Zańǵa qatysty usynǵan túzetýler haqynda jazdy, dep habarlaıdy almaty-akshamy.kz.
"Qurmetti, meniń sáýleli oqyrmandarym!
Meniń oqyrmandarymnyń arasynan lýdomanıa boıynsha suraq kóteretinder az emes.
Oıynqumarlyqqa ushyraǵan adamdar aınalasyndaǵy barlyq jaqyndaryna problema taýyp beredi.
Osy Zań jobasyna birshama túzetýler usyndym",- dep jazdy Májilis depýtaty.
Endi oıynhanaǵa kirýge 10 jylǵa tyıym salýǵa bolady. Onlaın múmkindik bar
Ózin-ózi shekteıtin tulǵalarǵa arnalǵan zań qumar oıyndarǵa qatysýdy ózin-ózi shekteýdiń eń joǵary merzimin 1 jyldan 10 jylǵa deıin ulǵaıtady.
Tyıym salýdy erterek toqtatý múmkin bolmaıdy. Zańmen sondaı aq Boryshkerlerdiń biryńǵaı tizilimine engizilgen jeke tulǵalarǵa qumar oıyndarǵa qatysýǵa jáne bás tigýge tyıym salý qosymsha anyqtalady, olardyń sany shamamen 3,5 mıllıon adam.
Osylaısha, qabyldanǵan sharalar býkmekerlik keńselerdiń áleýetti klıentteriniń sanyn azaıtýǵa baǵyttalǵan. Sonymen birge, joǵaryda atalǵan tulǵalardy qumar oıyndar men bás tigýge tartqany jáne jibergeni úshin zańdy tulǵalardyń ákimshilik jaýapkershiligi engizilgen.
Zań normalaryna sáıkes, memlekettik qyzmetkerlerge qumar oıyndardyń kez kelgen qyzmeti – býkmekerlik keńseler, kazınolar jáne onlaın kazınolar shekteletin bolady. Osylaısha, jalpy sany 280 myńǵa jýyq adamdy quraıtyn áskerı qyzmetkerler, memlekettik mekeme qyzmetkerleri, búdjettik uıymdardyń basshylary qumar oıyndarǵa qatysa almaıdy.
Zańdy buzǵan jaǵdaıda olarǵa qatysty keleńsiz sebeptermen jumystan bosatýǵa deıingi qatań sharalar qoldanylatyn bolady.
Oıyn bıznesin uıymdastyrýshylarǵa arnalyp oıyn mekemelerinde jáne ózderiniń ınternet-resýrstarynda qumar oıyndarǵa qatysýdyń jáne bás tigýdiń qaýiptiligi men zıany týraly eskertýlerdi ornalastyrýǵa mindetteme engizilýde.
Zań oıyn mekemeleriniń, býkmekerlik keńselerdiń nemese lotereıalardyń jumysynyń tıptik erejelerin qabyldaýdy kózdeıdi. Tıptik erejelerde kazıno men býkmekerlik keńseler klıentteriniń múddelerin qorǵaıtyn normalar kózdeletin bolady.
Zańmen qumar oıyndarǵa táýeldi adamdardy medısınalyq ońaltý tártibi de anyqtalǵan. Osylaısha, medısınalyq qupıany saqtaı otyryp, qumar oıyndarǵa táýeldi adamdarǵa konsýltatıvtik baqylaý dınamıkalyq tirkeýsiz engizilýde.
Zańnyń mańyzdy jańalyqtarynyń biri – 21 jasqa tolmaǵan tulǵalarǵa energetıkalyq sýsyndardy satýǵa tyıym salý. Osylaısha, bul norma balalardy energetıkalyq sýsyndardyń zıandy áserinen qorǵaýǵa múmkindik beredi.
Zań baılanys operatorlaryna qumar oıyndar men bás tigýge arnalǵan jarnamany qamtıtyn habarlamalardy jiberýge tyıym salady.
Býkmekerlik keńseniń nemese totalızatordyń ornalasqan jerinde, sport qurylystarynyń ishinde jáne sportshylardyń jabdyqtarynda ornalastyrylǵandardy qospaǵanda, ǵımarattarda, kólik quraldarynda býkmekerlik keńseler men totalızatorlar ǵımarattarynyń syrtqy jarnamasyna tyıym salynady.
BAQ-ta sporttyq taqyryptaǵy, sondaı-aq otandyq telearnalardyń halyqaralyq sport jarystaryn tikeleı translásıasy kezindegi jarnamany qospaǵanda, býkmekerlik keńseler men totalızatorlardy buqaralyq aqparat quraldarynda, kıno, beıne jáne anyqtamalyq qyzmetterde jarnamalaýǵa tyıym salynady. Býkmekerlik keńselerdiń jarnamasyn taratqan jaǵdaıda 60 AEK jáne odan joǵary aıyppuldar qarastyrylǵan.
Sondaı-aq, Týrızm jáne sport mınıstrliginiń sheteldik býkmekerlik keńselerdiń, lısenzıasy joq totalızatorlardyń, ınternet-kazınolardyń tizimin júrgizý, sondaı-aq bankter men tólem uıymdarynyń olardyń paıdasyna qarjylyq operasıalardy júrgizýine tyıym salý quzyretin belgileıdi. Sonymen birge, endi onlaın-kazıno uıymdastyrýshylaryna eki jylǵa deıin bas bostandyǵynan aıyrylýmen qylmystyq jaýapkershilikke tartylý qaýpi bar.
Aıta ketetin jáıt, Zańǵa sáıkes, elektrondy lotereıa bıletteri tek resmı ınternet-resýrs nemese lotereıa operatorynyń mobıldi qosymshasy arqyly satylady. Osylaısha, «Lotomatic» termınaldary men loto klýbtarynyń qyzmetine tyıym salyndy.
Munymen qosa, lotereıa bıletterin turǵyn úılerde, jataqhanalarda, uıymdarda, bilim berý, densaýlyq saqtaý, dinı ǵımarattary men qurylystaynrda, sondaı-aq bilim berý jáne densaýlyq saqtaý uıymdarynan júz metr radıýsta taratýǵa tyıym salynady.
Bul sharalar kóshelerde lotereıa ónimderiniń fızıkalyq turǵydan bolýyn birneshe esege azaıtady. Kóshede tek klasıkalyq lotereıalardy satatyn núkteler qalady.