Dana da, ǵalym da, qaıratker de bári-bári ustazdan bilim alǵan. Ustazsyz jer betinde júrgen pende joq shyǵar... Ustaz – uly mamandyq. Sondyqtan da ustazǵa qurmet kórsetip, únemi maqtan tutatynymyz!
Osynaý ustazdar kúni qarsańynda 157 jalpy bilim beretin mekteptiń ustazy Baıbosynova Nýrzada Aıtbekqyzymen áńgimelesken edik.
Ustaz degen qyzyq mamandyq qoı. Únemi izdenip júredi. Ár bala kúlimdep, júzi jarqyn júrse qýanatyn da osy muǵalim. Onyń ústine ustazdardyń ýaqytynyń basym bóligi shákirtterimen ótedi. Bolashaq jarqyn bolýy úshin biz talmaı jumys isteýimiz kerek. Sonda erteńgi kúni elimizdiń bolashaǵynyń kemeldengenin kórerimiz anyq
Jalpy men matematıka páninen sabaq beremin. Balalarǵa bilim berý barysynda eki nársege mán beremin. Birinshi, balalardyń oılaý qabiletin arttyrý úshin esepterdi oısha shyǵartýǵa tyrysamyn. Ekinshi, bala taqtada esep shyǵaryp jatqanda daýystap túsindirip otyrady. Bul balanyń jatyq sóıleýine áser etedi. Gadjetter men telefonǵa úńilgen ýaqytta balalardyń kóbi oıyn jetkize almaı jatady. Al men qoldanǵan ádis arqyly bala oılanyp, oıyn jetkizýde múdirmeıtin bolady.
Ótken jyly balalardyń arasynda «Meniń mektebim» atty esse jazǵyzdym. Sóıtip balalardyń jazǵanyn jınap, jýrnal qylyp shyǵardym. Bul balalardy yntalandyra túskeni anyq. Maqsaty aıqyn bala túptiń túbinde óz bıigin baǵyndyratyny anyq. Máselen, oqytyp júrgen shákirtterimniń bir parasy Nazarbaev Zıatkerlik mektebine, O.Jáýtikov atyndaǵy fızıka-matematıka orta mektep-ınternatyna túsip jatyr. Árıne, qýanasyń! Óıtkeni, bul bilim jolyndaǵy eńbegińniń óteýi ispetti.
Bir kezderi Qalqaman shaǵyn aýdanynda mektep sany az bolǵandyqtan «ıý» synyby bolǵan edi. Memleket basshysynyń tapsyrmasyna sáıkes shaǵyn aýdanda birneshe mektep salyndy. Nátıjesinde, synyp sany qysqardy. Jalpy, Oqý-aǵartý mınıstrliginiń keleli isteriniń arqasynda muǵalim mártebesi kóterilip, ustazǵa degen ustanym da jaqsardy. Endi bizge talmaı eńbektenip, balalardyń bilimdi bolýyna yqpal etý ǵana qaldy.
Táýelsizdiktiń 30 jyldyǵynda uıymdastyrylǵan "Elimizdiń erkindigi - Táýelsizdik" konkýrsyna qatystyq. Nátıjesinde ekinshi oryn aldym. Árıne, qanshama talantty ustazdardyń arasynan ekinshi oryndy alýdyń ózi zor mártebe, -deıdi ulaǵatty ustaz
Aıta ketý kerek, Nurzada Aıtbekqyzy Máskeý ınstıtýtynyń tanymal Peterson oqýlyǵyn resmı túrde kelisimshart boıynsha Qazaqstanda birinshi bolyp qazaq tiline aýdarǵan bolatyn.