«Oıan, qazaq» – byltyrǵy kúzde kınoteatrlarda qoıylyp, jaqsy kasa jınaǵan, Alash arysy Mirjaqyp Dýlatuly týraly fılm.
Bul týraly prodúser Aısáýle Ábilda óziniń FB paraqshasynda jazdy, dep habarlaıdy aqshamnews.kz
«Oıan, qazaq» fılminiń avtorlary – erli-zaıypty Murat Esjan men Aısáýle Ábilda Malaızıa eline qonys aýdarypty.
«Malaızıaǵa nege kóshkenimiz týraly kúnine birneshe adamnan suraq keledi, sonyń bir jaýabyn berip qoıaıyn dep sheshtim. Árıne, birinshiden, biz jańa jobamyzǵa bar yntamyzdy arnaı alatyndaı SHYǴARMASHYLYQ KÚI izdep keldik. Elde úıimiz ben ofısymyzdyń arasy qatty alys bolmasa da, kádimgideı ýaqytymyzdy alatyn. Keptelis, baratyn basqa da sharalar, toı, shaqyrys bar, sonymen ýaqyttyń qalaı ótkenin bilmeı qalyp júrdik. Al, bizdiń jumys ondaı erkelikti kótermeıdi, sebebi DEDLAIN degen dáý bar, ıaǵnı seriktesińmen kelisken ýaqytta sharýa bitý kerek, áıtpese kez kelgen isti ǵasyrlap isteı berýge bolady. Sharýanyń ýaqytyly bitip, jumystyń jaqsy júrýine eń jaýapty tulǵa - prodúser bolǵandyqtan, men bul máseleni barynsha qolaıly sheshýge tyrystym. Árıne, kóshe qalsań, isiń bite qoıady degen sóz emes, bastysy nıet jáne tyrysý, qalǵanyn nátıjeden kútý», - dep jazdy ol.
Balalarǵa aǵylshyn, qytaı tilderin meńgerip shyǵýǵa jaıly ortanyń bolýy da kóshýge sebep bolǵan.
«Ekinshiden, elde biz onsyz da úı men ofıs jaldap, balalarymyzdy aqyly mektepte oqytyp júrdik. Árıne, 100%, 70% grant alǵannyń ózinde tamaǵy men tasymaldaýyn ǵana tóleýge ár balaǵa kádimgideı qarajat ketetin, oǵan qosa jyl saıyn qysqy daıyndyq bar, onyń da óz shyǵyny jeterlik, sonyń bárin esepteı kele dál sondaı tólemge qaı memleketterde jaqsyraq jaǵdaıda jumys istep, balalarymyzǵa qosymsha til úıretetindeı múmkindikter bar dep zerttedik. Malaızıada orta bilim júıesiniń jaqsy damyǵany men balalarǵa aǵylshyn, qytaı tilderin meńgerip shyǵýǵa jaıly ortanyń bolýy da sheshimimizge áser etti. Úshinshiden, jańa elde turyp kórý - kókjıegińdi kádimgideı keńeıtip jiberedi ǵoı, sony da eskerip, jumys pen ómirdiń, bala-shaǵany jetkizýdiń arasynda óz damýymyzǵa da dem bereıik degen oımen ýaqytsha Malaızıaǵa kóshtik, - degen Aısáýle Ábilda FB jazbasynda.