Jýrnalıs atyndaǵy shákirtaqyǵa laıyqtylardy irikteý úshin baıqaý eki aı júrgizilgen
«Qazaqstan» teleradıokorporasıasy jýrnalıs, telejúrgizýshi Nurtileý Imanǵalıuly atyndaǵy stıpendıa ıegerlerin marapattady, dep habarlaıdy Almaty-akshamy.kz
Baıqaý JOO jýrnalısıka fakúltetiniń stýdentteri arasynda eki aı kóleminde júrgizilgen. Korporasıanyń oqý granty N.Imanǵalıulynyń televızıadaǵy tulǵasy jaıly úzdik beınematerıal usynǵan úsh stýdentke tabystaldy.
Basqarma tóraıymy Lázzat Tanysbaı baıqaýdyń maqsaty Qazaq televızıasy qalyptasa bastaǵan ýaqyttan teleefırdegi beınesimen tutas býynǵa úlgi bolǵan Nurtileý Imanǵalıulynyń esimi men shyǵarmashylyǵyn nasıhattaý, izbasarlaryna qoldaý kórsetý ekenin atap ótti.
«Oqý granty bastapqyda eki stýdentke belgilengen. Kelip túsken jumystar arasynda Nurtileý Imanǵalıulynyń shyǵarmashylyǵyn, telejúrgizýshi, tulǵa retindegi erekshelikterin ózgeshe qyrynan ashyp kórsetken stýdentter boldy. Beınematerıaldardy qarastyra otyryp, taǵy bir úmitkerdiń jumysyn úzdik dep tanyp, qosymsha grant berý týraly sheshim qabyldadyq», - dedi L.Tanysbaı.
Teleradıokorporasıa qyzmetkerlerinen qurylǵan arnaıy komısıanyń sheshimimen Almaty qalasyndaǵy Halyqaralyq aqparattyq tehnologıalar ýnıversıtetiniń 3 kýrs stýdenti Ańsaǵan Ǵalaladın, M.Áýezov atyndaǵy Ońtústik Qazaqstan ýnıversıtetiniń 2 kýrs stýdenti Qanat Joldasbekov, S.Amanjolov atyndaǵy Shyǵys Qazaqstan ýnıversıtetiniń 4 kýrs stýdenti Kúmisjan Isan Nurtileý Imanǵalıuly atyndaǵy oqý grantynyń ıegeri atandy.
«50 myń teńge kólemindegi aı saıynǵy stıpendıa stýdentterge bir oqý jylyna tólenedi», - dep habarlady arna saıty.