El Prezıdenti Qasym-Jomart Toqaevtyń halyqqa Joldaýy asa bir tarıhı qıyn, kúrdeli kezeńde, halyqaralyq qarym-qatynas, ekonomıkalyq tirshiliktiń aqsap turǵan tusynda jáne ishki saıası tutastyǵymyzǵa yqpal etetin áleýmettik-ekonomıkalyq problemalardyń oryn alǵan kezeńinde joldanyp otyr. Bul Joldaýynda Qasym-Jomart Kemeluly, eń áýeli, halyqtyń áleýmettik-turmystyq jaǵdaıyna mán berdi. Prezıdentimiz ekinshi – azyq-túlik baǵasynyń turaqsyzdyǵyna erekshe toqtaldy. Qazirgi tańda ár jerde ár túrli baǵamen satylyp jatqan azyq-túlikke jol bermeý kerektigi aıtyldy. Úshinshi meniń kókeıime qonǵan nárse – halqymyzdyń 40 paıyzynan astamy aýyldarda turady ǵoı. Búginde jerdi sheteldikterge satýǵa jáne jalǵa berýge tyıym salynǵany belgili. Al endi aýyldy jetildirý úshin jerdi ıgerý máselesine qatty nazar aýdaryldy. Memleket basshysy jaıylymdyq jerlerdi orynsyz paıdalanatyndar sharýa qojalyqtarynyń ósip-ónýine múmkindik bermeı otyr degendi ashyp aıtty. Bul - buryn aıtyla qoımaǵan ashshy aqıqat.
Taǵy bir aıta ketetin másele – qanshama rynokqa táýeldi elmiz degenmen, bizge rynokty monopolızasıalaý, belgili bir múddeli toptardyń, solardyń ǵana jeteginde ketý halyqtyń turmysynyń jaqsarýyna, erkin damýyna múmkindik bermeıdi.
Sondaı-aq, Joldaýda oqý-aǵartý isine baılanysty birsypyra ashyq áńgimeler aıtyldy. Sonyń ishinde meniń kókeıime qonǵany, myna ǵylymdy damytý, grant merzimin 5 jylǵa kóshirýi men granttyń oryndalýyn tekserip otyrýy. Bul aınalyp kelgende, eldiń ishki damýyn qamtamasyz etetin krıterıı dep esepteımin. Muǵalimderge bıyl da jaqsy mán berilip jatyr. Árıne, balalardyń saýatty, bilimdi bolýy mańyzdy, ol bizdiń bolashaǵymyz. Alaıda, búdjetten qamtamasyz etilip otyrǵan basqa da mamandar bar. Mádenıet nemese sport bolsyn, aldaǵy 2022 jyldyń 1 qańtarynan bastap osynyń báriniń jalaqysyn ósiredi jáne arǵy jyldarda da 20 paıyzdan qosyp otyrýdy jalǵastyrmaq. Osylaısha eldiń turmystyq jaǵdaıyn kóteredi.
Joldaý barysynda respýblıkadaǵy eń tómengi jalaqy kólemin 42 500 teńgeden 63 000 teńgege deıin kóterý týraly tapsyrma berildi. Odan keıin turǵyn úı máselesi syndy taqyryptardy qamtý eldiń ekonomıkalyq, áleýmettik jaǵdaıyn retke keltirýdiń naqty usynystary bolyp tur. Onyń ústine, Orta Azıanyń taǵdyry geosaıası turǵan ornyna baılanysty qaýip tóndirýge qolaıly desek bolady. Aýǵanstanda bolyp jatqan jaǵdaı bul óte úlken másele. Osy jaǵdaıda saıası qyraǵylyq tanytyp, Prezıdentimiz áleýmettik-turmystyq jaǵdaıdy retteýdi tıisti úkimet organdaryna naqtylap berdi.
Sonymen qatar, Memleket basshysy ekpe alýǵa qarsy úgittep júrgenderdiń jeteginde ketpegenimiz jón deıdi. Eldi adastyrmaý kerek. Ekpe alýǵa qarsy adamdar ózderiniń ǵana emes, ózgelerdiń ómiri úshin jaýapty ekenin túsingeni abzal.