Sý resýrstary jáne ırrıgasıa mınıstri Nurjan Nurjigitov sý únemdeý taqyrybynda ashyq sabaq ótkizip, «Sý únemde - bolashaqty saqta» atty aýqymdy jobany bastap berdi.
Qoǵamda sý únemdeý mádenıetin damytýǵa baǵytalǵan joba Sý resýrstary jáne ırrıgasıa mınıstrliginiń bastamasymen jáne Astana qalasy bilim basqarmasynyń qoldaýymen júzege asyp otyr, dep habarlaıdy aqshamnews.kz.
Joba aıasynda bir mezette Astananyń 111 mektebinde synyp saǵattary ótip, 200 myńǵa jýyq oqýshy elimizdiń sý resýrstary jáne ony únemdeýdiń mańyzy týraly aqparatpen tanysty. Balalar sýdy tıimdi paıdalaný jóninde óz oılarymen bólisip, ony saqtaý taqyrybynda sýret saldy.
Nurjan Nurjigitov №104 mekteptiń oqýshylaryna elimizde sý resýrstaryn únemdeý jáne ony tıimdi paıdalaný boıynsha vedomstvonyń atqaryp jatqan jumysy týraly aıtyp berdi. Mınıstrlik 2024-2026 jyldarǵa arnalǵan sý únemdeýdiń Jol kartasyn ázirledi. Qujat sý zańnamasyn jetildirý, sý salasyn sıfrlandyrý, sýdy esepke alý men sý únemdeýdiń zamanaýı tehnologıalaryn engizý jónindegi is-sharalardy kózdeıdi. Budan bólek, turmystyq jaǵdaıda sý únemdeý boıynsha ádistemelik nusqaýlyq ázirlendi.
Mınıstr «ashyq mıkrofon» formatynda oqýshylar men muǵalimderdiń suraqtaryna jaýap berdi. Kezdesýde sý únemdeý ádisteri, ózen-kólderdi saqtaý jáne sý salasynyń mamandaryn oqytý jóninde suraqtar qoıyldy.
«Nelikten biz mektep oqýshylarynan bastaýdy jón kórdik? Sebebi, mektep jaqsy ádet pen durys daǵdy úlgisin qalyptastyrýǵa qolaıly orta bolyp tabylady. Bul joba oqýshylardyń sý resýrstarynyń mańyzy týraly bilimin arttyrýǵa, jastardyń ekologıalyq jaýapkershiligin damytyp, qala mektepterinde sý únemdeý qozǵalysyn qalyptastyrýǵa arnalǵan. Biz aldaǵy ýaqytta bul jobanyń aýqymyn respýblıka kóleminde odan ári damytyp, barlyq jastaǵy azamattardy qamtýdy josparlap otyrmyz. Sebebi sý - ortaq baılyq, bárimiz úshin qajet qundy resýrs. Ony únemdeýge jáne saqtaýǵa barlyǵymyz úles qosa alamyz»,- dedi Sý resýrstary jáne ırrıgasıa mınıstri Nurjan Nurjigitov.