Ankarada Nurǵısa Tilendıevtiń 100 jyldyq mereıtoıyna oraı TÚRKSOI uıymy aıasyndaǵy eske alý jylynyń ashylý rásimi ótti, dep habarlaıdy aqshamnews.kz.
İs-sharaǵa TÚRKSOI Bas hatshysy Sultan Raev, Qazaqstannyń Túrkıadaǵy Elshisi Erkebulan Sápıev, Ankara mýzyka jáne óner ýnıversıtetiniń rektory, Túrki álemi óner ýnıversıtetteri keńesiniń basshysy Erhan Ózden, Qazaqstannan arnaıy kelgen ónerpazdar, dıplomattar, depýtattar men qazaq dıasporasy qatysty.
Ashylý saltanaty Ankaranyń ataqty «Túrki álemi» mýzyka tobynyń N.Tilendıev shyǵarmalaryn oryndaýymen bastaý aldy. Odan ári qonaqtar kompozıtordyń fotokórmesiniń tusaýyn kesip, N.Tilendıev memorıaldy mýzeıiniń ǵylymı qyzmetkeri Nurmuhan Shaımerdenov kelgen qonaqtarǵa uly kúıshiniń óner jáne ómir jolymen tanystyrdy.
E.Sápıev óz sózinde «Nurǵısa Tilendıevtiń mýzykasy bizge tek ónerdiń bıigin kórsetip qana qoımaı, elimizdiń mádenıetine jáne ulttyq biregeıligine degen súıispenshilikti arttyrady. Onyń eli úshin sińirgen eńbegi urpaqtan-urpaqqa úlgi bolyp qalary sózsiz» ekenin jetkizdi.
TÚRKSOI Bas hatshysy Sultan Raev Nurǵısa Tilendıevtiń tek qazaq jurtyna ǵana emes búkil túrki álemine belgili tulǵa bolǵanyn alǵa tartty. Qazaqstannan arnaıy kelgen Qazaq memlekettik akademıalyq fılarmonıasynyń dırektory Aqan Ábdýálı, N.Tilendıev atyndaǵy akademıalyq fólklorly-etnografıalyq «Otyrar sazy» orkestriniń kúıshisi Arsen Tursyn, Ankaradaǵy qazaq stýdentterinen quralǵan «Otaý» ansambli kompozıtordyń keremet shyǵarmalaryn oryndap, is-sharaǵa erekshe atmosfera syılady.