Otandasymyz fınalda ózinen fızıkalyq áleýeti joǵary ırandyq Aınaz Nasırıden jeńilip qaldy.
Bul jekpe-jekte Nuraıǵa óte qıyn bolatyny aıdan anyq edi. Qarsylas óte tájirıbıeli, denesi myǵym. Dese Nuraı bar jigerin jumsady, dep habarlaıdy aqshamnews.kz.
Qazynabek aqtyq synǵa deıin Ispanıa, Belgıa, Meksıka, jartylaı fınalda Kanada sportshysyn utty. Nuraıdyń sińlisi Toǵjan Qazynabek Chhýnchhondaǵy basty básekege ketti. Ol sońǵy jarys kúni synǵa túsedi.
Nuraı túrli jas sanatynda 3 ret Qazaqstan chempıonatynda top jarǵan. Ol qyzdar arasynda álem chempıonatynyń fınalyna shyqqan 2-qazaq taekvondoshysy. Osydan 2 jyl buryn alǵash ret Aıdana Súndetbaı aqtyq synǵa shyǵyp, qarsylasyna ese jibergen. Ázirge qyzdarymyz álem chempıonatynda altyn ala almaı kele jatyr.
Osyndaı derekterdi translásıa uıymdastyryp, efır kezinde bárimizge jetkizip otyrǵan taekvondodan eń aýqymdy fan-paraqsha @taekwondo_wt_kz negizin qalaýshy Saıasat Ótemuratovqa raqmet.
ANYQTAMA:
Búgin Ońtústik Koreıanyń Chhýnchhon qalasynda taekvondodan jastar arasyndaǵy álem chempıonaty bastaldy.
Alǵashqy jarys kúni daıangqa bizdiń komandadan Eleanora Sheraly (52 kg), Beket Bolatuly (63 kg), Nuraı Qazynabek shyqty. Bulardyń arasynda alysqa shapqany tek Nuraı boldy. Qyzylordanyń týmasy úshin bul jastar arasyndaǵy sońǵy jyl. Kelesi jyldan bastap ol eresekter sanatyna ótedi.
Chempıonat 1-6 qazan aralyǵynda ótedi. Bıyl 127 el + beıtarap tý astyndaǵy (Reseı men Belarýs) sportshylar men bosqyndar komandasyn qosqanda 963 taekvondoshy júldege talasady.