Onyń aıtýynsha, «Sıfrlyq notarıat» jobasy notarıaldyq qyzmetterdi halyqqa barynsha qoljetimdi, qaýipsiz jáne tıimdi etip, zamanaýı talaptarǵa saı etedi.
«Áleýmettik turǵydan taǵy bir mańyzdy joba – notarıýstyń atqarýshylyq jazbasyn sıfrlandyrý. Buryn bul rásim tek qaǵaz túrinde júrgizilip, birqatar problema týǵyzǵan edi: notarıýstar, mıkroqarjy uıymdary jáne jeke sot oryndaýshylary arasyndaǵy kelisim jaǵdaılary; boryshkerlerdiń materıaldarǵa ýaqtyly qol jetkize almaýy; qarsylyqtardy jedel jiberýdiń múmkin emestigi; aýmaqtyq qaǵıdattyń buzylýy; jyl saıyn ádilet organdaryna 7 myńǵa jýyq shaǵym túsýi. Osy máselelerge jaýap retinde barlyq is-áreketti tirkeýdi jáne taraptardyń quqyqtaryn qorǵaýdy qamtamasyz etetin sıfrlyq mehanızm engizildi», – dedi B.Moldabekov.
Boryshkerdiń jeke kabıneti qurylyp, ol arqyly habarlama alý jáne qarsylyq jiberý múmkindigi berildi. Eger qarsylyq negizdi bolsa, notarıýs atqarýshylyq jazbany mindetti túrde joıýǵa tıis, óıtkeni bul jaǵdaıda qaryz daýsyz bolyp sanalmaıdy. Nátıjesinde 19 800 atqarýshylyq jazba joıyldy. Bul azamattardyń quqyqtaryn qalpyna keltirý jáne teris paıdalanýdy joıý baǵytyndaǵy mańyzdy qadam boldy. Osylaısha, rásimniń sıfrlandyrylýy júıeni ádil, ashyq etip, barlyq qatysýshynyń quqyqtaryn qorǵaýǵa baǵyttalǵan.
Qazaqstan Respýblıkasynyń Konstıtýsıasyna sáıkes ár azamattyń quqyqtary qorǵalady. Ony iske asyrý jáne tegin zań kómeginiń qoljetimdiligin arttyrý maqsatynda Ádilet mınıstrligi «E-Zań kómegi» atty biryńǵaı sıfrlyq júıeni qurdy. Bul júıe memlekettik kepildendirilgen zań kómegin elektrondyq formatta kórsetýge múmkindik beredi.