Respýblıka kúni qarsańynda, ıaǵnı 25 qazan kúni Almaty polısıasy kúsheıtilgen qyzmet atqarý tártibine kóshedi.
Qoǵamdyq tártipti saqtaý maqsatynda mereke kúnderi 3,5 myń polıseı jumyldyrylady. Bul týraly Óńirlik komýnıkasıalar qyzmeti alańynda Almaty qalasy Polısıa departamentiniń resmı ókili Saltanat Ázirbek málimdedi, - dep habarlaıdy Aqshamnews.kz.
Spıkerdiń aıtýynsha, Almatydaǵy krımınogendik jaǵdaı turaqty jáne baqylaýda. Onyń dáleli – qylmys deńgeıiniń 12 paıyzǵa tómendeýi. Sondaı-aq aýyr jáne asa aýyr qylmystardyń ashylý kórsetkishi de jaqsarǵan.
«İshki ister mınıstri aǵymdaǵy jyldy «Profılaktıka jyly»dep jarıalaǵan bolatyn. Osyǵan oraı, erekshe nazar quqyqbuzýshylyqtardyń aldyn alýǵa aýdarylyp otyr. Ásirese kámeletke tolmaǵandar arasyndaǵy quqyqbuzýshylyqtardyń, turmystyq janjaldar men jol qozǵalysy qaýipsizdigine qatysty quqyqbuzýshylyqtardyń aldyn alý baǵytynda jumystar júrgizilip jatyr», – dedi Saltanat Ázirbek.
Merekelik kúnderi ishki ister organdarynyń jeke quramy kúsheıtilgen rejımde qyzmet atqarady.
Barlyq bólimsheler – patrúldik polısıa, ýchaskelik ınspektorlar, ıývenaldy jáne kóshi-qon qyzmeti, kınologtar men jedel bólimsheler jumysqa tartylady.
Qoǵamdyq kólikte jáne azamattar kóp jınalatyn oryndarda – saıabaqtarda, alańdarda, saýda-oıyn-saýyq ortalyqtarynda baqylaý kúsheıtiledi.
Spıkerdiń aıtýynsha, qalada kólik qozǵalysyn shekteý josparlanbaǵan. Bul másele merekelik is-sharalar ótkizý kezinde qalyptasatyn jaǵdaıǵa baılanysty sheshiledi.
«Polısıa qyzmeti Memleket basshysy Qasym-Jomart Toqaev jarıalaǵan «Zań jáne tártip» qaǵıdaty aıasynda jumys isteıdi. Bizdiń basty mindetimiz – árbir almatylyq pen qala qonaǵynyń ózin qaýipsiz sezinýin qamtamasyz etý», – dep atap ótti spıker.
Sonymen qatar, polısıa profılaktıkalyq jáne túsindirý jumystaryna erekshe kóńil bólýde. Halyqpen kezdesýler, oqý oryndarynda dárister, aksıalar men birlesken is-sharalar ótkizilip, quqyqtyq mádenıetti arttyrýǵa baǵyttalǵan jumystar júrgizilýde.
Almaty polısıasy buqaralyq aqparat quraldary jáne azamattyq ınstıtýttarmen belsendi birlese halyq arasynda quqyq qorǵaý júıesine degen senimdi nyǵaıtý jáne zańǵa baǵynýshylyq mádenıetin qalyptastyrý baǵytynda jumys isteıdi.
Departamenttiń resmı ókili atap ótkendeı, polısıa bólimsheleriniń, jergilikti atqarýshy organdar men azamattardyń jedeldigi arqasynda Almatydaǵy jedel jaǵdaı turaqty ári boljamdy deńgeıde saqtalyp otyr.