Elimizdiń Norvegıadaǵy elshiligi Skandınav elin azat etý jolynda mert bolǵan 74 qazaqstandyq sarbazdyń esimin anyqtady.
Olar birneshe atqyshtar dıvızıalarynyń jáne 69, 72-teńiz atqyshtar brıgadasynyń quramynda soǵysyp, Petsamo-Kırkenes operasıasy barysynda ajal qushqan. Tizimde tutqynda qaza tapqan qazaq sarbazdarynyń da aty-jóni bar. Elshilik endi sol batyrlardyń týǵan-týystaryna, urpaqtaryna izdeý salady, dep habarlaıdy Almaty-akshamy.kz
Ekinshi dúnıejúzilik soǵys kezinde nemister Norvegıadaǵy lagerlerge 100 myńnan astam keńes tutqynyn ákelip, qara jumysqa jekken. Tutqynda, Norvegıany azat etý kezinde ajal qushqan 15 myń sarbaz eldiń birneshe aımaǵyndaǵy baýyrlastar zıratyna jerlengen. Falstad ortalyǵynyń zertteýshileri sol 15 myń sarbazdyń 7 myńynyń esimin anyqtap, saıtqa jarıalady. Endigi kózdegenderi - qalǵan 8 myń jaýyngerdiń kim ekenin anyqtaý.
«Men 12-13 jyldan beri osyny zertteýmen aınalysyp júrmin. Esimderi anyqtalǵan azamattardy uzaq jyl izdegen týystary bizdiń derekqordan taýyp jatsa, ózimizdi baqytty sanar edik. Keńes sarbazdary jaıly sońǵy 15 jylda birneshe kitap jazyldy, kórme uıymdastyrdyq. Bizdiń halyq, jas urpaq jaýyngerlerdiń erlikterin umytpaýy kerek», - dedi «Falstad» ortalyǵynyń ǵylymı zertteýshisi Arne Langas.
Norvegterdiń áskerı zırattar bazasyndaǵy derekterin saralaýdyń arqasynda elimizdiń Norvegıadaǵy elshiliginiń qyzmetkerleri 74 qazaqstandyq sarbazdyń esimin anyqtady. Olar - Almaty qalasy, Aqmola, Aqtóbe, Jambyl, Qyzylorda, Soltústik Qazaqstan, Túrkistan, Shyǵys Qazaqstan oblystarynyń týmalary.
Elshilik qyzmetkerleri ázirge esimi anyqtalǵan 74 sarbazdyń ekeýiniń ǵana urpaǵyn taýyp, súıinshi habardy jetkizgen. Qalǵandarynyń týǵan-týystaryn izdestirip jatyr. Elshiliktiń, Syrtqy ister mınıstrliginiń saıttarynan atalarynyń esimin taýyp, Skandınav elindegi zıratyna kelem deýshilerge Elshilik qyzmetkerleri qoldan kelgen kómekti kórsetýge daıyn. Dıplomattar qyrshynnan qıylǵan bozdaqtardyń esimin, jatqan jerin anyqtaý jumystaryn ári qaraı da jalǵastyra bermek.