Nıderlandynyń Qazaqstandaǵy Tótenshe jáne Ókiletti Elshisi Nıko Sqermers Sý resýrstary jáne ırrıgasıa mınıstrliginiń sý tasqyny saldaryn joıý is-sharalaryna qatysty pikir bildirdi.
Elshi sý tasqynyn boljaý jáne sý tasqynynyń aldyn alý máselesinde Qazaqstan men Nıderlandynyń yntymaqtastyǵyna jeke toqtaldy, dep habarlaıdy aqshamnews.kz Sý resýrstary jáne ırrıgasıa mınıstrligine silteme jasap.
«Nıderland sarapshylarynyń aıtýynsha, mınıstrlik bıyl úlken jumys atqardy. Kóptegen esepteýlerdi qolmen jasaý kerek bolsa da, nátıjeleri óte dál keldi. Meniń oıymsha, bizdiń elderimiz birlesip sheshýi kerek basty másele - úlken aýmaqtarda esepteýler júrgizý. Klımattyń ózgerýine baılanysty biz jańa syn-qaterlerge tap boldyq. Osy mindetterdi sheshý úshin Nıderlandy tarapy mınıstrlikpen birlesip jumys isteýge daıyn. Sý resýrstary jáne ırrıgasıa mınıstrligi óte úlken jumys istep jatyr dep sanaımyn. Qazaqstanda kóptegen donorlyq uıymdar jumys isteıdi. Sol sebepti Úılestirý keńesin qurý mınıstrliktiń halyqaralyq qoǵamdastyqtyń kúsh-jigerin biriktirý men úılestirýdi baıypty qabyldaǵanyn kórsetedi. Bul óte mańyzdy»,– dedi Nıko Sqermers.
Aıta keteıik, osyǵan deıin Sý resýrstary jáne ırrıgasıa mınıstrligi men Delft sý bilim berý ınstıtýty (IHE Delft) arasyndaǵy memorandým aıasynda nıderlandylyq sarapshylar Astanada sý tasqyny táýekelderin basqarý boıynsha eki márte semınar ótkizgen bolatyn.
Eske salsaq, Qazaqstannyń sý sektoryn damytý jónindegi áriptesterdiń Úılestirý keńesiniń quramyna BUU, halyqaralyq uıymdar men qarjy ınstıtýttarynyń ókilderi, sondaı-aq sheteldik damý agenttikteriniń, dıplomatıalyq korpýs pen bıznes ókilderi kiredi.