Búgingi tańda Almaty qalasynyń, Shyǵys Qazaqstan jáne Almaty oblystarynyń polısıa departamentteri Dınara Smaıylovaǵa (Dına Tańsári) qatysty kórineý jalǵan aqparat taratý, jeke ómirge qol suǵylmaýshylyqty buzý faktileri boıynsha alty qylmystyq is qozǵap, tergep jatyr. Onyń ishinde eki is — alaıaqtyq boıynsha, dep habarlaıdy almaty-akshamy.kz Polisia.kz. silteme jasap.
Sotqa deıingi tergeý barysynda Smaıylovanyń «NeMolchıKZ» qorynyń basshysy ekeni, sonymen qatar ózin qoǵam belsendisi, quqyq qorǵaýshy jáne áıelder men balalarǵa qatysty zorlyq-zombylyqpen kúresýshi retinde kórsetetindigi anyqtaldy. Ol óz qyzmetin áleýmettik jelilerde keńinen jarıalaıdy. Alaıda Smaıylovanyń kóptegen jarıalanymdary shyndyqqa janaspaıdy, sebebi olar tergeýmen rastalmaǵan. Onyń jalǵan habarlarymen quqyǵy buzylǵan azamattar shaǵym túsirdi. Tergeý men júrgizilgen sot saraptamalary kórsetkendeı, «NeMolchıKZ» qorynyń basshysy tek óziniń sýbektıvti pikirine súıene otyryp, aıyptaý basylymdaryn jazǵan. Smaıylova jalǵan aqparat taratýmen qatar 2021 jyldan bastap, ózi Qazaqstan Respýblıkasynan tys jerde bola tura, óziniń áleýmettik jelilerdegi paraqshalarynda zorlyq-zombylyq qurbandaryna kómek kórsetý úshin qarajat jınaıtynyn jarıalaǵan. Máselen, Shyǵys Qazaqstan oblysynyń polısıa departamenti tergep jatqan alaıaqtyq aıasynda sáýir aıynda Smaıylova Óskemen qalasynda kámeletke tolmaǵan qyzdyń ózine qol jumsaǵany týraly jalǵan málimet jarıalaǵany anyqtaldy. Sodan keıin ol qaza bolǵan adamnyń otbasyna kóńil aıtyp, bul jaǵdaıdy joqqa shyǵarǵan polısıaǵa senbeı, óz-ózine qol jumsaý áreketiniń bolǵanyn jáne qyzdyń aýrýhanada jatqanyn málimdegen. Alaıda bul jarıalanymdardyń bári jalǵan bolyp shyqty, óıtkeni is júzinde sýısıd bolǵan joq. Atalmysh kámeletke tolmaǵan qyz zardap shekken buzaqylyq faktisi boıynsha qylmystyq is sotqa jiberildi. Osyǵan qaramastan Smaıylova jábirlenýshiniń advokatyna aqsha jınaıtynyn jarıalap, sot prosesi kezinde 20 mln teńgeden astam qarajat jınaǵan. Onyń az ǵana bóligin issapar shyǵyndaryna tólegen. Alaıda sotta advokattyń qyzmetin jábirlenýshi taraptyń ózi tólegeni belgili boldy, bul sottalýshylardyń qorǵaýshylarynyń narazylyǵyn týdyrdy, — deıdi İİM tergeý departamenti bastyǵynyń orynbasary Samat Aısov.
Alaıaqtyq boıynsha taǵy bir qylmystyq isti Almaty oblysynyń polısıa departamenti kámeletke tolmaǵan zorlyq-zombylyq qurbanyna kómek kórsetý úshin aqsha jınaý faktisi boıynsha qozǵady.
Bul jaǵdaıda Smaıylova bir otbasyndaǵy zorlyq-zombylyq týraly jalǵan habarlama jarıalap, oqyrmandarynan aqsha aýdarýdy surap, jubaıynyń Kaspi kartasynyń rekvızıtterin kórsetken. Tergeý barysynda zorlyq-zombylyq faktisi rastalmady. Biraq bank málimetterine sáıkes kórsetilgen ýaqyt ishinde Smaıylova taǵy da birneshe mıllıon teńge jınap úlgergen. Sonymen qatar sottyń sanksıasymen alynǵan bank málimetterin taldaý barysynda Smaıylova Komersıalyq emes uıymdar týraly zańnyń talaptaryn buza otyryp, ózi shetelde bola turyp, aýdarymnan túsken aqshany jubaıynyń jeke kartochkasyna alǵany, sondaı-aq aqshany óz qajetine jumsaǵany anyqtaldy. Alynǵan dáleldemelerdi eskere otyryp, tergeý organy Smaıylovanyń is-áreketin Qylmystyq kodekstiń 190-babynyń 3-bóligi boıynsha saralap, 27 jeltoqsanda oǵan izdeý jarıalandy. Sotqa deıingi tergeý jalǵasyp jatyr, — dedi Samat Aısov.