Qazaqstandyq kıbersportshy Danııl Golýbenko Brazılıanyń Furia komandasy sapynda FISSURE PLAYGROUND 2 týrnırinde jeńiske jetti, - dep habarlaıdy Aqshamnews.kz tilshisi.
21 qyrkúıekte CS2 (Counter-Strike - esk.) oıyny boıynsha FISSURE PLAYGROUND 2 týrnıriniń fınaly ótti.
Fınalda mońǵolıalyq The Mongolz pen qazaqstandyq oıynshy Danııl Golýbenko óner kórsetetin brazılıalyq Furia klýby kezdesti.
Qorytyndy boıynsha týrnır jeńimpazy bolyp brazılıalyq komanda tanyldy. Esep – 3:2.
Týrnırdiń júlde qory - 500 myń dollar(271 mıllıon teńge), onyń ishinde jeńimpazǵa 200 myń dollar (108 mıllıon teńge) berildi.
Oıynnan keıin qazaqstandyq kıbersportshyǵa týrnırdiń eń úzdik oıynshysy (MVP) medali tabystaldy.
Týrnır barysynda Danııl 18 kart oınap, ortasha jeke reıtıńi 1,19 boldy.
Júldege qol jetkizgennen keıin 20 jastaǵy qazaqstandyq oıynshy argentınalyq juldyzdy forvard Lıonel Messıdiń áıgili sýretin qaıtalady. Danııl Golýbenko trofeıdi qushaǵyna alyp, ústine Qazaqstan týyn jamylyp, uıyqtap jatqandaı keıip tanytyp, sýretin áleýmettik jelige júktegen.
Bul sýretke kıbersport áleminiń ǵana emes, kóptegen tanymal tulǵa pikir bildirgen.
Olardyń ishinde Brazılıa ulttyq quramasynyń jáne "Santos" klýbynyń shabýylshysy, álemdik fýtbol juldyzy Neımar da bar.
